கலைச்சோலை

பாலிவுட் படத்தில் மீண்டும் விக்ரம்!

2011-12-26T09:46:00.001-08:00

Add caption

ராவண் படத்துக்குப் பிறகு மீண்டும் பாலிவுட் படம் ஒன்றில் நடிக்கிறார் நடிகர் விக்ரம். இந்தப் படத்தை மலையாள இயக்குநர் பிஜாய் நம்பியார் இயக்குகிறார். மலையாள இயக்குநரின் பாலிவுட் படத்தில் மீண்டும் விக்ரம்! விக்ரம் முதல் முதலாக நடித்த இந்திப் படம் ராவண். மணிரத்னம் இயக்கி படுதோல்வியைச் சந்தித்த படம் இது. ஆனாலும் படத்தில் ஹீரோ அபிஷேக் பச்சனை விட, ராவணாக நடித்த விக்ரமுக்கு ஏக பாராட்டுகள் குவிந்தன. இப்போது மீண்டும் ஒரு இந்திப் படத்தில் நடிக்க அவருக்கு வாய்ப்பு வந்துள்ளது. இந்தப் படத்துக்கு டேவிட் என பெயர் வைத்துள்ளனர்.மணிரத்னத்தின் உதவியாளராக இருந்த பிஜாய் நம்பியார் இந்தப் படத்தை இயக்குகிறார். இதுகுறித்து விக்ரம் கூறுகையில், "பிஜாய் இயக்கும் இந்திப் படத்தில் நடிப்பது உண்மைதான். 2012-ல் ஒரே ஷெட்யூலாக படப்பிடிப்பை முடித்து வெளியிடத் திட்டமிட்டுள்ளோம். ராவண் படம் பண்ண போதே, பிஜாயுடன் எனக்கு நெருங்கிய பழக்கம்," என்றார். இந்தியில் வெளியான சைத்தான் என்ற படத்தை ஏற்கெனவே இயக்கியவர் இந்த பிஜாய் நம்பியார் என்பது குறிப்பிடத்தக்கது.

முதல் புதினம்... முதல் விருது!

2011-12-26T09:45:00.000-08:00

சாகித்ய அகடமி விருதை இளம் வயதில் வாங்கி சாதனை படைத்திருக்கிறார் சு.வெங்கடேசன்! இந்த ஆண்டுக்கான சாகித்ய அகடமி விருது, தமிழ் மொழிக்காக இவருக்கு அறிவிக்கப்பட்டு உள்ளது.
மதுரையின் 600 ஆண்டு கால வரலாற்றைத் தொகுத்து, 'காவல் கோட்டம்’ என்ற தலைப்பில் எழுதி இருந்த, தன்னுடைய முதல் புதினத்துக்கே சாகித்ய அகடமி விருது பெற்றுள்ள வெங்கடேசன், திருப்பரங்குன்றத்தைச் சேர்ந்தவர். தமிழ்நாடு முற்போக்கு எழுத்தாளர் சங்கத்தின் மாநில துணைப் பொதுச் செயலாளராகவும் செயல் பட்டு வருபவர்.
இலக்கிய உலகில் தீவிரமாக இயங்கும் வெங்க டேசன் இதுவரை, 'ஓட்டை இல்லாத புல்லாங்குழல்’, 'திசையெல்லாம் சூரியன்’, 'பாசி வெளிச்சத்தில்’, 'ஆதி புதிர்’ ஆகிய கவிதைத் தொகுப்புகளையும் 'கலாசாரத்தின் அரசியல்’, 'ஆட்சித் தமிழ் ஒரு வரலாற்றுப் பார்வை’, 'கருப்பு கேட்கிறான் கெடா எங்கே?’ போன்ற சில ஆய்வுக் கட்டுரைகளையும் எழுதி இருக்கிறார். 'காவல் கோட்டம்’ புதினத்தில், மதுரையை ஆட்சி செய்த நாய்க்க மன்னர்களின் வரலாறு மற்றும் மதுரையில் காவல் பணி புரிந்த கள்ளர் இனத்தவர்களின் வரலாறு ஆகிய இரண்டையும் எளிய நடையில் கூறி இருக்கிறார்.

வாழ்த்து மழையில் நனைந்து கொண்டு இருந்த வெங்கடேசனிடம் பேசினோம். ''என் முதல் நாவலுக்கே அங்கீகாரம் கிடைத்திருப்பது மகிழ்ச்சி யாக இருக்கிறது. கடந்த மூன்று ஆண்டுகளில் வெளிவந்த படைப்புகளை ஆய்வு செய்துதான் விருதுக்குத் தேர்ந்து எடுக்கிறார்கள். அந்த வகையில் தான், 2008-ம் ஆண்டு வெளிவந்த 'காவல் கோட்டம்’ விருதுக்கு தேர்வு செய்யப்பட்டு உள்ளது. மதுரையின் 600 ஆண்டு கால வரலாற்றைச் சொல்லும் இந்த நாவலுக்காக கிட்டத்தட்ட 15 ஆண்டுகள் உழைத் தேன். அதற்கான பரிசுதான் இப்போது கிடைத்து இருக்கிறது. இந்த நாவலில் 24 பக்கம் கொண்ட ஒரு சிறுகதைதான் வசந்தபாலன் இயக்கும் 'அரவான்’ திரைப்படம். இந்தப் புதினம் வெளிவந்தபோது வரலாறு முழுமையாகச் சொல்லப்படவில்லை என்ற விமர்சனமும் வந்தது. நாவலைப் பற்றிய விமர்சனம் என்ற போர்வையில், தனிநபர் மீதான விமர்சனம் தான் செய்யப்பட்டு இருந்தது. அதற்கும் இப்போது காலம் பதில் சொல்லி இருக்கிறது'' என்றார்.
வாழ்த்துக்கள்!
- எஸ்.கோபாலகிருஷ்ணன்

முப்பொழுதும் உன் கற்பனைகள் >> முன்னோட்டம்

2011-12-19T09:04:00.000-08:00

விண்ணைத்தாண்டி வருவாயா, கோ போன்ற வெற்றிப்படங்களை தயாரித்த எல்ரெட் குமார், அடுத்து மாபெரும் பொருட்ச்செலவில் தயாரித்து, இயக்கி வரும் படம் "முப்பொழுதும் உன் கற்பனைகள்".

இப்படத்தின் ஹீரோவாக அதர்வாவும், ஹீரோயினாக அமலா பாலும் நடித்துள்ளனர். படத்தில் அதர்வா முழுக்க முழுக்க கற்பனைகளுடன் வாழ்ந்து கொண்டிருக்கும் கதாபாத்திரத்தில் வருகிறாராம். இவருடைய கற்பனையில் வரும் காதலியாக அமலா பால் நடித்துள்ளார். கற்பனையில் சந்தித்த அமலா பாலை, அதர்வா நிஜமாகவே நேரில் பார்த்தால் என்ன நடக்கும்? என்பதைத்தான் வித்தியாசமான முறையில், ‌பெரும் பொருட்ச்செலவில் பாடமாக்கி வருகிறார் எல்ரெட் குமார்.

படத்தின் பாடல்கள் அனைத்தையும் தாமரையே எழுதியுள்ளார். அதிலும் இவர் எழுதிய ஒரு தாலாட்டு பாடல் ரொம்பவே பேசப்படுமாம். படத்தின் பாடல் வரிகளுக்கு ஏற்ப, இசையும் அற்புதமாக அமைத்துள்ளார் ஜீ.வி.பிரகாஷ். படத்தின் சூட்டிங் கிட்டத்தட்ட முடியும் தருவாயில் உள்ளது. 2012ம் ஆண்டு திரைக்கு வர இருக்கிறது.

மதுரையில் மார்கழி தமிழிசைத் திருவிழா

2011-12-19T08:58:00.001-08:00

மதுரை: மதுரையில் திருநாவுக்கரசர் இசை ஆராய்ச்சி, இசைக்கல்வி அறக்கட்டளை சார்பில், மார்கழி தமிழசைத் திருவிழா நடந்தது. தேவாரம், திருவாசகம், திருப்புகழ், தமிழிசை மூவர் பாடல்கள் பாடப்பட்டன. திருமுறை இசையை குமரகுருபரன் பாடினார். செல்வி மானஷா மற்றும் அனுப்ரியா, திவ்யா சகோதரிகளின் தமிழிசை நடந்தது. தேவார திருவாச இன்னிசையை சிவபிரசாத் நிகழ்த்தினார். பின், சங்கரநாராயணனின் வீணை இசை நடந்தது. அவந்திராஜ் தமிழிசை பாடல்களை பாடினார். விழாவில் பங்கேற்றவர்களுக்கு, தேவார திருமுறை நூல்கள், சனிபகவான் தல தேவாரப்பதிக நூல்களை, தருமபுர ஆதீனப் புலவர் குருசாமி வழங்கினார். ஏற்பாடுகளை மிருதங்கம் இசைக் கலைஞர் தியாகராஜன், சுரேஷ் சிவன், இளங்கோவன், சரவணன், சுப்பிரமணியசாமி, அய்யனார் செய்தனர்.

சென்னை பட விழாவில் இன்று என்ன படம் பார்க்கலாம்

2011-12-17T01:40:00.000-08:00

உட்லண்ட்ஸ்

10.15 AM

SLEEPING SICKNESS (2011/ ஜெர்மெனி/ 91 நி)
இயக்குனர்: Ulrich Kohler'

கேமரூனில் 'ஸ்லீப் சிக்னஸ்' நலத் திட்டத்தின் மேலாளராக கடந்த 20 ஆண்டுகளாக இருக்கிறார், Eddo Velten. அவரது மனைவி Vera ஜெர்மெனியில் உள்ள தனது சொந்த கிராமத்திலேயே மீண்டும் செட்டில் ஆகிவிடலாம் என்கிறாள். அவளது விருப்பப்படி செய்வதற்கு Ebboவுக்கும் ஆசை. ஆனால், அந்த விருப்பத்தை தவிர்ப்பது என தீர்மானிக்கிறான். அதன் தொடர்ச்சியாக, மூன்று ஆண்டுகளுக்குப் பிறகு சில நிகழ்வுகள். சொந்த வாழ்க்கையிலும் சமூகச் சூழலிலும் மாற்றங்கள். சர்வதேச அரசியலையும், தனி மனித உணர்வுகளையும் மிகச் சிறப்பாக பதிவு செய்த படம் இது. குறிப்பாக, மேற்கத்திய நாடுகளின் உதவி பெறும் ஆப்பிரிக்காவின் நிலையை அறிவுப்பூர்வமாக பதிவு செய்திருக்கிறது.

61st Berlin International Film Festival-ல் இப்படத்துக்காக, Silver Bear for Best Director விருதை இயக்குனர் Köhler வென்றதே இப்படத்தின் சிறப்பைச் சொல்லும்.

*

12.30 PM

17 GIRLS (2011/ பிரான்ஸ்/ 90 நி)
இயக்குனர் : Delphine Coulin
கடற்கரையை ஒட்டிய ஒரு சிறு நகரம். ஒரே பள்ளியில் படிக்கும் 17 டீன் ஏஜ் பெண்கள் எவருமே யோசிக்காத வித்தியாசமான திட்டத்தை அரங்கேற்றம் செய்ய முயற்சிக்கிறார்கள். ஒரே நேரத்தில் கர்ப்பம் அடைவது தான் அந்தத் திட்டம். பிறகு சொல்ல வேண்டுமா என்ன..? - இது, 2008-ல் நடந்த உண்மைச் சம்பவத்தை அடிப்படையாகக் கொண்டு எடுக்கப்பட்ட படம்!

*

3.00 PM

SLEEPING BEAUTY (2011/ ஆஸ்திரேலியா/ 104 நி)
இயக்கம் : Julia Leigh

யூனிவர்சிட்டியில் பயிலும் லூஸி, தன் படிப்புக்கு தேவைப்படும் பணத்துக்காக செய்யும் அசாதாரணமான வேலைகளும், அதனால் அவள் வாழ்வில் நிகழும் சம்பவங்களையும் சொல்கிறது இப்படம். 'மிதமிஞ்சிய காமம் சார்ந்தது' என்ற அடைமொழியுடன் பல்வேறு படவிழாக்களில் வலம் வந்த படம் இது.

*

5.00 PM

A SEPARATION (2011/ ஈரான்/ 120 நி)
இயக்குனர் : Asghar Farhadi

Nader-ஐ விட்டுப் பிரிந்து செல்கிறாள் மனைவி. தனது வயதான தந்தையை கவனிக்க, இளம் பெண் ஒருத்தியை வீட்டு வேலைக்குச் சேர்க்கிறான், Nader. அந்தப் பெண் ஒரு கர்ப்பிணி மட்டுமல்ல; மனஉறுதியில்லாத தனது கணவரின் அனுமதியின்றி பணியாற்றுகிறாள் என்பது அவனுக்குத் தெரியாது. அதைத் தொடர்ந்து எழும் பொய்கள், சிக்கல்கள், போராட்டங்கள் சொல்லி மாளாது.

61st Berlin International Film Festival-ல் சிறந்த படம், சிறந்த நடிகை, சிறந்த நடிகருக்கான Golden Bear விருதுகளை அள்ளியது. கோல்டன் பியர் விருது பெற்ற முதல் ஈரானியப் படம் என்பது சிறப்பு. அத்துடன், சிறந்த வெளிநாட்டுத் திரைப்படங்களுக்கான பிரிவில், ஈரானில் இருந்து அதிகாரப்பூர்வமாக ஆஸ்கருக்கு அனுப்பப்பட்ட படம் என்பதும் இப்படத்தை தவறாமல் பார்க்கத் தூண்டும் அம்சம்.

*

8.00 PM

I MISS YOU (2011/ ஸ்வீடன்/ 125 நி)
இயக்குனர் : Anders Gronros

Tinaவும் Cillaவும் இரட்டைச் சகோதரிகள். தெற்கு ஸ்வீடனில் உள்ள 15 வயது சிறுமிகள் இருவரும் பார்ப்பதற்கு ஒரே தோற்றத்தைக் கொண்டிருப்பவர்கள். ஆனால், வெவ்வேறு குணாதிசயங்களைக் கொண்டவர்கள். ஒருநாள் பள்ளிச் செல்லும்போது, Cilla கார் விபத்தில் மரணம் அடைகிறாள். இதனால், தனித்தவளாகிவிடும் Tina தனது வாழ்க்கையைச் சமநிலைப்படுத்த முடியாமல் சகோதரியின்றி தவிக்கிறாள். இரட்டைப் பிறவிகள் பற்றிய வந்த படைப்புகளில் தனித்துவம் கொண்டது இப்படம்.

****

உட்லண்ட்ஸ் சிம்பொனி

10.30 AM

HAWY (2010)/ எகிப்து/ 112 நி)
இயக்குனர் : Ibrahim El-Batout

5 ஆண்டுகால தனிமைச் சிறைக்குப் பிறகு விடுதலை செய்யப்படுகிறார், 40 வயது Youssef. பல நாட்களாக தன்னிடம் இருந்த சில ஆவணங்களுடன் வெளியேறுகிறார். Alexandria செல்லும் அவர், Ibrahim and Fady ஆகியோரைச் சந்திக்கிறார். அவர்கள் 20 ஆண்டுகளுக்கு முன்பாக Youssef உடன் சிறையில் உடன் இருந்தவர்கள். இந்த மூன்று கதாப்பாத்திரங்களின் அடுத்தகட்ட நிலை என்ன? Alexandriaவின் எழில், Youssefக்கு வாழ்வதற்கான வேட்கையை ஏற்படுத்துகிறதா இல்லையா?

*

12.45 PM

PAKARNATTAM (2011/ மலையாளம்/ 95 நி)
இயக்குனர் : ஜெயராஜ்
பையனூர் மற்றும் அதைச் சுற்றியுள்ளப் பகுதிகளில் படம்பிடிக்கப்பட்ட PAKARNATTAM, அந்தப் பகுதி அரசியல் வன்முறைக்கு ஆளாவது பற்றி அலசுகிறது. சமகால அரசியலையும், அரசியல் பழிதீர்த்தலையும் சொல்லும் இப்படம், எண்டோசல்பான் பூச்சிக் கொல்லியால் ஏற்பட்ட பாதிப்புகள், அதன் தொடர்ச்சியான போராட்டங்களை கதையினூடே அழுத்தமாக பதிவு செய்திருக்கிறது. இந்தியாவில் சினிமா ஆர்வலர்களால் கொண்டாடப்பட்டு வருகிறது. இந்திய பட விழாக்களிலும் நல்ல வரவேற்பைப் பெற்றுள்ளது.

*

5.45 PM

KARMAYOKI (2011/ மலையாளம்/ 118
இயக்குனர் : வி.கே.பிரகாஷ்

ஷேக்ஸ்பியரின் 'ஹேம்லெட்' நாடகத்தைத் தழுவி எடுத்தப் படம். Chathothu குடும்ப சந்ததியின் ஒரே ஆண்பிள்ளையான Rudran Gurukkal பற்றிய கதை. கடவுள் சிவன் பிறந்ததாக நம்பப்படும் யோகி சமூகத்தைச் சேர்ந்த குடும்பத்தைச் சொல்லும் இந்தப் படம், Rudran அசாதாரண சிக்கல்களை திரைக்கதையாக காண்பித்துள்ளது. இந்தியாவில் நடந்த சர்வதேச திரைப்பட விழாக்களில் பங்குபெற்ற படம் இது.

*

8.00 PM

DAUGHTER OF THE NILE (1987/ தைவான்/ 91 நி)
இயக்குனர் : Hsiao-hsien Hou

கடுமையான புற வாழ்க்கையின் யதார்த்தத்தில் இருந்து, தனக்குப் பிடித்த காமிக் புத்தகமான Daughter of the Nile மூலம் தன்னை விடுவித்துக்கொள்கிறாள், பள்ளி மாணவி ஒருத்தி. சலனத்தன்மை மிக்க இயல்பு மிகுந்திருந்த போதிலும், தைவானின் வாழ்க்கை முறையின் தன்மையை சொல்லியிருக்கும் படம் இது.

***

ஃபிலிம் சேம்பர்

10.00 AM

LULL (2010/ ஹங்கேரி/ 91 நி)
இயக்குனர்: Tamos Sas

ஒரு படகில் பயணம் செல்லும் மூன்று பெண்களைப் பற்றிய கதை. ஒரு கோடை தினத்தில் ஜாலியாக வலம்வரச் செல்கிறார்கள் அந்தப் பெண்கள். ஆனால், அது மறக்க முடியாத கறுப்புப் பயணமாக அமைகிறது. வெளிக்கொணரப்படும் ரகசியங்கள், வெடித்து வெளியேறும் உணர்வுகள் என அந்த மூன்று பெண்களுக்கு நேரும் அனுபவங்களே LULL.

*

12.30 PM

தெய்வத் திருமகள் (2011/ தமிழ்/ 155 நி)
இயக்குனர் : விஜய்

அஞ்சு வயசுப் பெண்ணின் அப்பாவுக்கும் அஞ்சு வயசு என்றால் என்ன ஆகும்?

மன வளர்ச்சி குன்றிய விக்ரமுக்கு பெண் குழந்தையைப் பிரசவித்துவிட்டு இறந்துவிடுகிறார் அவரது மனைவி. மனதளவில் குழந்தையாக இருக்கும் விக்ரமே, அந்தக் குழந்தையை வளர்க்க வேண்டிய சூழல். மகள் சாராவே (அறிமுகம்) உலகம் என்று விக்ரம் வாழ, 'ஃப்ரெண்ட்லி’ அப்பாவுடன் சந்தோஷமாக வளர்கிறாள் சாரா.

விகடன் விமர்சனம் : தெய்வத்திருமகள்

3.30 PM

எங்கேயும் எப்போதும் (2011/ தமிழ்/ 135 நி)
இயக்குனர் : எம்.சரவணன்

காதலும் விபத்தும் 'எங்கேயும் எப்போ தும்’ நிகழலாம்!

எதிர்பாராத கணத்தில் நிகழும் ஒரு விபத்து, சிலரின் வாழ்க்கையை எப்படியெல்லாம் சிதைத்துக் குலைக் கிறது என்பதைச் சொல்லும் படம். இந்த இழப்பும் துயரமும் நம்மில் யாருக்கும் 'எங்கேயும் எப்போதும்’ நடக்கும் என்பதை அழுத்தமாகச் சொல்லி அதிரவைத்ததில், அறிமுக இயக்குநர் சரவணனுக்கு அடிக்கலாம் ஒரு வெல்கம் சல்யூட்!

விகடன் விமர்சனம் : எங்கேயும் எப்போதும்

*

6.30 PM

LATE BLOOMERS (2011/ பிரான்ஸ்/ பெல்ஜியம்/ 90 நி)
இயக்குனர் : Julie Gavras

ஓர் ஆணுக்கும் பெண்ணுக்கும் இடையிலான காதல் கதை. ஒரு தருணத்தில், சில காலம் பிரிய முடிவு செய்கிறது அந்த ஜோடி. பிற்காலத்தில் ஒன்று சேரலாம் என்பதே இதன் நோக்கம். மேரி - ஆடம் என்ற ஜோடி, நீங்கள் நினைப்பது போல் 20, 30 வயதுள்ள இளம் ஜோடி அல்ல. அவர்கள் 60 வயது ஜோடி. பிறகு..? 21-ம் நூற்றாண்டின் வயோதிகர்களின் மனநிலையைச் சொல்லும் படம் இது.

ஸ்டூடியோ - 5

10AM

A SUMMER AT GRANDPA'S 1986 / தைவான்/ 93 நி
இயக்குனர் : Hsiao-hsien Hou

தாய்க்கு உடல்நலம் சரியாக இல்லாததால், தாத்தா வீட்டுக்கு போகிறார்கள் ஒரு சிறுவனும் அவனது சகோதரியும். அங்கு, மரங்கள் மீது ஏறி விளையாடுதல், நீச்சல் அடித்தல் போன்ற அனுபவங்களோடு பதின்பருவத்தில் புதிதான அனுபவங்களும் அவனை எப்படி பாதிக்கிறது என்பதை சொல்கிறது இப்படம்.

Locarno-வில் ஜூரி விருதும் Nantes Three Continents விழாவில் Golden Montgolfiere விருதும் வென்றது இப்படம்.

*

12.15 PM

THE MONK / ஸ்பெயின் - பிரான்ஸ் / 2011 / 101 நி
இயக்குனர் : Dominik Moll

பெரிதும் மதிக்கப்படும் துறவியை தடுமாற வைக்க சாத்தான் எடுக்கும் முயற்சிகளும் அதன் விளைவுகளையும் சொல்லும் படம் இது. பெண் துறவி வேடம் பூண்டு துறவியிடம் மாணவியாக இருக்கும் மெடில்டா, மெல்ல மெல்ல துறவிக்கு ஆசை மூட்டி, அவரது புலனடக்கதை இழக்க வைக்கிறாள். ஆசை கொண்ட துறவி, அந்தோனியா என்னும் மற்றொரு மாணவி / சிஷ்யை மீதும் தன் கவனத்தை திருப்புகிறார்.

துறவி அந்தோனியாவை அடைய மெடில்டா உதவுகிறாள். காமம் கண்ணை மறைக்க, துறவி அந்தோனியாவை நாசப்படுத்தி கொன்று விடுகிறார். சாத்தானின் பிடியில் சிக்கியிருக்கும் துறவிக்கு காத்திருக்கும் அடுத்தடுத்த அதிர்ச்சிகளை விவரிக்கிறது THE MONK.

5.15 PM
GHOSTED / UK / 2011 / 102 நி
இயக்குனர் : Craig Viverios

சிறையில் தன் வேலைகளை சரிவரச் செய்து கொண்டு தன் தண்டனைக் காலத்தை கழிக்கிறான் ஜாக். ஜாக்'கின் மனைவி அவனை விட்டு விலகப் போவதாக சொல்ல, மனம் தடுமாறுகிறான். மனக்குழப்பத்தில் இருக்கும் ஜாக்'கிற்கு ஆறுதலாக அவனது நண்பன் அகமது இருக்கிறான். பால் என்னும் புதிய கைதி உள்ளே வர, ஜாக் அவன் மீது பாசத்தோடு இருக்கிறான்.

க்ளே என்னும் தீயவனின் பிடியில் பால் சிக்க, அவனை காப்பாற்ற ஜாக் எடுக்கும் முயற்சிகளையும் அதன் விளைவுகளையும் விவரிக்கிறது இப்படம்.

7.30 PMPURE (2010 / ஸ்வீடன் / 97நி)
இயக்குனர் : Lisa Langseth

பள்ளிப்படிப்பை முடித்திராத கேதரீனா, எந்த வேலையிலும் நிலைத்திருக்க முடிவதில்லை. தன் தாயைப் போல தானும் ஆகிவிடுவோமோ என்று மன வருத்தத்தில் இருக்கிறாள். ஒரு நாள் தற்செயலாக யூடியூப் வீடியோவில் இசைக் கலைஞர் மோசார்ட்டின் இசையைக் கேட்டு மயங்கிப் போகிறாள். அந்த இசையினால் அவளது வாழ்க்கை எப்படி மாறிப்போகிறது என்பதை சொல்கிறது இப்படம்.

தன் நண்பனை, தாயை, தோழிகளை விட்டு விலகி, ஒரு இசை அரங்கில் வேலைக்கு சேர்கிறாள். அங்கு தன்னை விட மூத்தவரான இசைக் கோர்ப்பாளருடன் தொடர்பு கொள்கிறாள். கேதரீனா வாழ்வில் தான் தேடியதை அடைந்தாளா, அவளது மனம் ஏங்குவது எதற்காக என்பதை விவரிக்கிறது PURE.
__________________________

INOX

10 AM
CALAMARI UNION / FINLAND / 1985 / 80 நி

வாழும் ஊரில் தாம் நடத்தப்படும் விதம் பிடிக்காமல், மற்றொரு ஊருக்கு செல்ல திட்டமிடுகிறது ஒரு குழு. அவர்களோடு மற்றொருவனும் சேர்ந்து கொள்ள, எல்லோரும் போகும் ஊரில் நிம்மதியாக வாழலாம் என்ற எண்ணத்தோடு பயணிக்கின்றனர். வழியில் அவர்கள் எதிர்கொள்ளும் இடர்ப்பாடுகள், அதனை அவர்கள் சமாளிக்கும் முறைகள் என விரிகிறது திரைக்கதை. அவர்கள் எல்லாரும் புதிய இடத்தை சென்றடைந்தார்களா, அவர்கள் நினைத்தபடி தான் அந்த ஊர் இருந்ததா என்பதை சொல்கிறது இப்படம்.

12.15 PM
MICROPHONE / EGYPT / 2010 / 120 நி
இயக்குனர் : Aahmad Abdalla

பல வருடங்கள் கழித்து சொந்த ஊருக்கு திரும்புகிறான் காலித். தன் தன் பழைய காதலியைத் தேடிப் போக, அவளோ வேறு இடத்திற்கு குடிபோகப் போவதாக சொல்லிச் சென்று விடுகிறாள். வெந்த புண்ணில் வேல் பாய்ச்சுவதாக தனக்கும் தன் தந்தைக்குமான உறவிலும் விரிந்திருக்கும் மன விரிசலை உணர்ந்து துவண்டு போகிறான் காலித்.

வாழ்க்கையில் பிடிப்புப் போக, தெருக்களில் சுற்றி வரும் காலித்துக்கு தற்செயலாக நிகழும் சம்பவங்கள், அவனது வாழ்க்கையையே மாற்றிவிடுகின்றன.

அக்டோபர் 2010 Carthage film festival-ல் The Golden Tanit விருது உட்பட பல்வேறு விருதுகளை அள்ளியது இப்படம்.

4.30 PM
THE FRONT LINE / கொரியா / 2011 / 133 நி
இயக்குனர் : Hun Jang

கொரியாவில் நடந்த யுத்தத்தின் முடிவில் ஒரு தென் கொரிய ராணுவ கமாண்டர் கொல்லப்பட, அது குறித்து விசாரிக்க போகிறார் ராணுவ உயரதிகாரி Kang Eun-Pyo.

விசாரிக்கப் போன் இடத்தில், இறந்து விட்டதாக கருதப்பட்ட தனது பழைய நண்பன் Kim Soo-Hyeok-ஐ பார்க்கிறார். சிறு வயதில் பார்த்த Kim Soo-Hyeok மாறிப்போய் இப்போது ஒரு படைக்கு தலைமை தாங்கி நடத்துவதைப் பார்த்து ஆச்சர்யப்படுகிறார். அதன் பிறகு நடக்கும் சம்பவங்களையும் போராட்டங்களையும் விவரிக்கிறது இப்படம்.

2011-ல் நான்கு Grand Bell விருதுகளை வென்றது THE FRONT LINE.

நன்றி : விகடன்

'டேம் 999' பட இயக்குனருக்கு கே ஆர் நாராயணன் புரஸ்காரம் விருது!

2011-12-16T08:37:00.000-08:00

புதுடெல்லி: தமிழகம் மற்றும் கேரளா என இரு மாநிலங்களிடையே சிறிய பிரச்னையாக இருந்த முல்லை பெரியாறு அணை விவகாரத்தை, தனது படத்தின் மூலம்

மிகப்ªபரிய மற்றும் பூதாகரமான பிரச்னையாக உருவெடுக்க காரணமாக இருந்த டேம் 999 பட இயக்குனர் சோகன் ராய், இந்த ஆண்டின் கே ஆர் நாராயணன்

புரஸ்காரம் விருதுக்கு தேர்ந்தெடுக்கப்பட்டுள்ளார்.

நாட்டின் முன்னாள் ஜனாதிபதி கே.ஆர்.நாராயணன் வழங்கம் நிதியின் மூலம் ஆண்டுதோறும் இவ்விருது வழங்கப்பட்டு வருவது குறிப்பிடத்தக்கது.

இதுதொடர்பாக, பத்திரிகையாளர்களை சந்தித்த அந்த நிதியத்தின் தலைவர் உழவூர் விஜயன் தெரிவிக்கையில், முல்லை பெரியார் அணை உடைவதன் மூலம்

கேரள மக்களுக்கு ஏற்படும் பாதிப்பை நேரில் பார்த்தது போன்று இருந்தது அப்படம்.

இப்படத்தின் மூலம் மாநில மக்களுக்கு உரிய நேரத்தில் விழிப்புணர்வு ஏற்பட்டுள்ளதாக அவர் கூறினார். தங்களுடைய துறைகளில் சிறந்து விளங்குபவர்களுக்கு

ஆண்டுதோறும் இந்த விருது வழங்கி கவுரவிக்கப்படுகிறது. இம்மாத இறுதியில் நடைபெற உள்ள நிகழ்ச்சியில், சோகன் ராய்க்கு இவ்விருது வழங்கப்பட உள்ளதாக அவர் மேலும் கூறினார்.

பாரதி பிறந்த நாள்: எட்டையபுரத்தில் கவியஞ்சலி

2011-12-10T22:14:00.000-08:00

தூத்துக்குடி, டிச.11: மகாகவி பாரதியின் பிறந்த தினத்தை முன்னிட்டு எட்டையபுரத்தில் எழுத்தாளர்கள், கவிஞர்கள் அஞ்சலி செலுத்திவருகின்றனர்.

அனைத்து இந்திய தமிழ் எழுத்தாளர்கள் சங்கம் சார்பில் எழுத்தாளர் விக்கிரமன் தலைமையில் கவிஞர்கள், எழுத்தாளர்கள் இன்று காலை ஊர்வலம் சென்றனர். மாலை வரை பாரதியின் நினைவு இல்லத்தில் கவிஅஞ்சலி செலுத்துகின்றனர்.

திருவாரூரில் பாரதி பிறந்த நாளை ஒட்டி, 130 மாணவர்கள் கலந்துகொண்ட ஊர்வலம் நடைபெற்றது. 130 பேரும் பாரதியாரைப் போன்று வேடமிட்டு, திருவாரூர் வீதிகளில் இன்று காலை ஊர்வலமாகச் சென்றது பொதுமக்களிடையே ஆர்வத்தை ஏற்படுத்தியது.

உயிர்கள் வாழ வாய்ப்புள்ள கிரகம் கண்டுபிடிப்பு!

2011-12-06T09:55:00.001-08:00

பூமியை போன்றே, உயிர்கள் வாழக்கூடிய வாய்ப்புள்ள கிரகம் ஒன்றைக் கண்டுபிடித்திருப்பதாக அமெரிக்க விண்வெளி ஆராய்ச்சியாளர்கள் அறிவித்துள்ளனர். பூமிக்கு, 600 ஒளிவருட தொலைவில் இருப்பதாக கண்டறியப்பட்டுள்ள இந்த கிரகத்திற்கு கெப்ளர் -22B என்று பெயரிடப்பட்டுள்ளது. ஒரு ஒளிவருடம் என்பது சுமார் 10 ட்ரில்லியன் கிலோமீட்டர் தூரத்திற்கு சமமானது.

தண்ணீர் உட்பட உயிரினங்கள் வாழ தேவையான சூழ்நிலை, இந்த கிரகத்தில் இருப்பதாக தெரிவிக்கப்பட்டுள்ளது. இந்த கிரகம், சூரியனைப் போன்ற ஒரு நட்சத்திரத்தை சுற்றி வருவதாக கண்டுபிடிக்கப்பட்டுள்ளது.

பூமி உள்ள சூரிய மண்டலம் தவிர விண்வெளியில், உயிரினங்கள் வசிக்ககூடிய கிரகம் இருக்கிறதா என்பதைக் கண்டறிவதற்காக அமெரிக்க விண்வெளி ஆராய்ச்சி அமைப்பான நாசா, மூன்று ஆண்டுகளுக்கு முன்னர், கெப்ளர் தொலைநோக்கி மூலம் விண்வெளியை ஆராயத் தொடங்கியது. இந்தத் தொலைநோக்கி மூலமே, தற்போது இந்த புதிய கிரகம் கண்டுபிடிக்கப்பட்டுள்ளது.

கந்தர்வ கானம்' படைத்த திருலோக சீதாராம்!

2011-12-06T05:26:00.000-08:00

1944-ஆம் ஆண்டில் ஓர் அதிகாலையில் நான் கோயம்புத்தூரில், அவிநாசி சாலையில் நடந்து கொண்டிருந்தேன். புகழ்பெற்ற பெரிய மனிதர் ஒருவரின் மாளிகை வாசலுக்கு வந்ததும், உள்ளே நுழைந்து அவரைப் பார்த்துவிட்டுப் போகலாமே என்ற எண்ணம் எழுந்தது. அந்த மாளிகையில் நுழைவது அவ்வளவு எளிதன்று. முதியவரான வாயிற்காவலர் வழி மறித்து ஒரு நீண்ட காகிதத்தை நீட்டினார். அதைப் பூர்த்தி செய்து மாளிகைக்குள் அனுப்பி, எஜமானர் அனுமதி கிடைத்த பிறகுதான் உள்ளே நுழைய அனுமதி என்பது அங்கிருந்த விதி. வந்திருப்பவர் யார்?, என்ன தொழில்?, மாளிகை எஜமானரைக் காண விரும்பும் காரணம் என்ன?, முன்னறிவிப்பு அல்லது அழைப்பு உண்டா? என்பன போன்ற பற்பல வினாக்களுக்கு அதில் விடையளிக்க வேண்டும்'' என்று கவிஞர் திருலோக சீதாராம் தாம் முதலில் அந்தப் புகழ்பெற்ற மனிதரைக் காணச்சென்ற அனுபவத்தைத் தம் "இலக்கியப் படகு' என்னும் கட்டுரைத் தொகுப்பில் எழுதியுள்ளார்.

"இலக்கியப் படகு' - கவிஞரின் எண்ண அலைகளில் அசையாது நின்ற சிந்தனைப் படகின், சுவையான விவரங்கள் அடங்கியத் தொகுப்பு. 40 ஆண்டுகளுக்கு முன்பு தமிழ்நாட்டில் பாரதி புகழ்ப் பரப்பிய எழுத்தாளர், சொற்பொழிவாளர், கவிஞர் திருலோக சீதாராம்.

சொற்பொழிவிலே கம்பீரம், எழுத்திலே ஆவலை எழுப்பும் சுவையுடன் கூடிய ஆற்றல் படைத்த திருலோக சீதாராம், உலகப் புகழ்பெற்ற விஞ்ஞானி - தொழிலதிபர் ஜி.டி. நாயுடுவைப் பற்றிய அறிமுகக் கட்டுரையில் வரிக்கு வரி ஆவலைத் தூண்டும் வகையில் எழுதிய சொற்சித்திரம் அனைவரையும் கவர்ந்தது.

கவிஞர் அந்தப் படிவத்தை வாங்கிப் படித்தார். "பார்க்க விரும்பும் காரணம்?' என்ற கேள்விக்கு "சும்மா' என்று எழுதியிருந்தார்.

தொழில் விஞ்ஞானி ஜி.டி.நாயுடு அந்தப் படிவத்தைப் பார்த்தார். "சும்மா' என்று துணிவுடன் எழுதியவரைச் சந்திக்க அனுமதி அளித்தார்.

அந்தக் கணம் - அந்த விஞ்ஞானியுடன் கவிஞருக்கு ஏற்பட்ட அறிமுகமும், பிறகு பலமுறை சந்திக்கும் வாய்ப்பையும், ஆழ்ந்த நட்பையும் ஏற்படுத்தின. ஜி.டி. நாயுடுவின் வாழ்க்கை வரலாற்றைப் பலர் எழுதியிருக்கலாம். ஆனால் கவிஞர், பத்திரிகையாளர், சொற்பொழிவாளர் என்று பல தகுதிகள் படைத்த திருலோக சீதாராம் எழுதிய நூல்தான் முதன்மையானது.

1917-ஆம் ஆண்டு ஏப்ரல் 1-ஆம் தேதி பிறந்தார் திருலோக சீதாராம். "திருலோக' என்று இதுவரையில் பெயர் புனைந்தவர்கள் யாருமிலர். திருவையாறு லோகநாத சாஸ்திரியின் மகனாகப் பிறந்த

சீதாராம், திருவையாறு ஊரின் முதல் எழுத்து "திரு'வையும், தந்தையின் பெயரில் உள்ள "லோக'த்தையும் சேர்த்துக்கொண்டார். தாயார் பெயர் மீனாட்சிசுந்தரம் அம்மையார்.

ஒருமுறை கோயம்புத்தூரில் சன்மார்க்க சங்க விழாவில், சுத்தானந்த பாரதியார், ""இவர் சாமான்யப்பட்டவரல்லர், திரிலோக மின்சாரப் புயல், திரிலோக சஞ்சாரி'' என்று கூறிப் பாராட்டினார். திரிலோக சஞ்சாரியாக அவர் பல ஊர்களுக்குப் பலரைக் காணச் செல்வார். ஓரிடத்திலேயே இருக்கமாட்டார்.

தன் கருத்தைச் சுவையாக வெளிப்படுத்த "தேவசபை' என்னும் அமைப்பை நிறுவினார். இருபது, முப்பது பேர்தான் கூடுவர். இதையே அவர் "அமரர் சங்கம்' என்றார். திருப்பராய்த்துறை காவிரிக் கரையில் தொடங்கப்பட்ட அந்தத் திருக்கூட்டங்களில் அவர் பேசக் கேட்டவர்கள் பாக்கியவான்கள்.

மகாகவி பாரதியாரின் புதல்விகள் சகுந்தலா பாரதியையும், தங்கம்மாள் பாரதியையும், நான் நடத்திய மாத இதழ் அலுவலகத்துக்கு அழைத்து வந்து, எனக்கு அவர்களை அறிமுகப்படுத்தியதோடு, இரண்டு சிறந்த வரலாற்றுப் பதிவு பெறத்தக்க கட்டுரைகளை எழுதுமாறு செய்த, (குறிப்பாக முற்றுப்பெறாத "சந்திரிகையின் கதை'யைப் பற்றி தங்கம்மாள் பாரதி எழுதிய கட்டுரை) மறக்க முடியாத நிகழ்ச்சி.

திருலோகம், மகாகவியைப் பரப்புவதை மட்டும் தம் லட்சியமாகக் கொள்ளவில்லை. மகாகவி பாரதியின் மறைவுக்குப் பிறகு செல்லம்மாள் பாரதி, திருச்சி-தில்லை நகரில் வசித்து வந்தார். அங்கு பாரதி குடும்பத்தாரின் நலன்களையும் கவனித்துக்கொள்வதைத் தன் கடமையாகக் கொண்டார்.

அவருடைய எண்ணங்களின் தொகுப்பு, "இலக்கியப் படகு' என்ற நூலாக வெளிவந்திருக்கிறது. அவை, "சிவாஜி' இதழில் அவர் எழுதிய கட்டுரைகளின் தொகுப்பு. அது ஒன்றுதான் ஓரளவுக்கு அவர் வாழ்க்கை லட்சியத்தை இந்தத் தலைமுறைக்கு விவரிக்கிறது.

எட்டாம் வகுப்பு வரையில்தான் படித்தார். தெலுங்கைத் தாய்மொழியாகக் கொண்டவர். இளம் பருவத்தில் புரோகிதராகவும் இருந்திருக்கிறார். அதில் பிடிமானமில்லாமல், பள்ளி ஆசிரியராகப் பணிபுரிந்திருக்கிறார். எத்தகைய பொருளானாலும் அவர் குறிப்பு ஏதுமில்லாமல் பேசத் தொடங்கிவிடுவார். திருச்சி தமிழ்ச் சங்கமானாலும் சரி; கொல்கத்தா தமிழ்ச் சங்கமானாலும் சரி, அவர் பேசும் தலைப்புக்குக் குறிப்பு ஏதும் தயாரிக்க மாட்டார். மடைதிறந்த வெள்ளம், சொல்மாரி என்பார்களே அதைப்போன்றே பேச்சமையும்.

ஜெர்மன் மொழியில் எழுதப்பட்ட சித்தாந்தாவைக் கவிஞர், தமிழில் மொழிபெயர்த்தார். மூலம் எது, மொழியாக்கம் எது என்று பாகுபாடு சொல்ல முடியாத அளவுக்கு மொழிபெயர்ப்பு ஆற்றல் அவருக்குள் இருந்தது.

திருச்சியிலிருந்து எழுத்தாளர் ஏ.எஸ்.ராகவனுடன் எஸ்.எஸ்.வாசனைச் சந்திக்கச் சென்று, தன் சொல்லாற்றலால் சம்மதிக்க வைத்ததோடு, வாசன் வரலாற்று புகழ்மிக்க சொற்பொழிவை நடத்த வைத்த திறமை, ஆற்றலை அன்றிருந்த எழுத்தாளர்கள் சொல்வர். இன்று திருச்சியில் சங்கம் வைத்து நடத்துபவர்கள் அறியமாட்டார்கள்.

அவருடைய சொல்லாற்றலை - பாரதியைப் பற்றிய புலமையை அறிந்த எஸ்.எஸ்.வாசன், ஆனந்த விகடனில் தொடர்ந்து எழுதச்சொன்னார். 100 கட்டுரைகள் எழுதவேண்டும் என்ற லட்சியத்துடன் தொடங்கி, 23 கட்டுரைகளுக்கு மேல் எழுதமுடியவில்லை. அக்கட்டுரைகள், "புதுயுகக் கவிஞர்' என்ற தலைப்பில் நூலாக வெளிவந்திருக்கிறது.

36 ஆண்டுகள் "சிவாஜி' இதழை இடைவிடாமல் நடத்தினார். இறுதியாக "கவிஞர் அச்சகம்' என்னும் அச்சகத்தை ஏற்படுத்தி நூல்களை அதில் அச்சிட்டு வெளியிட்டார்.

திருலோக சீதாராமின் உயிர் நண்பர் அறிஞர் டி.எஸ்.ராமச்சந்திரன் ஆங்கிலக் கவிதையில் மிக்க புலமை பெற்றவர். பாரதியை ஆங்கிலத்தில் அறிமுகப்படுத்தியவர். திருலோக சீதாராமைப் பற்றி உள்ளும் புறமும் சொல்லக்கூடியவர் அவர். கவிஞர் திருலோக சீதாராம் எழுதிய "கந்தர்வ கானம்' என்னும் ஒப்பற்ற காவியத்துக்கு முன்னுரையும் விரிவான அணிந்துரையும் எழுதியுள்ளார். அணிந்துரையில் கீழ்க்கண்டவாறு எழுதியுள்ளார்:

""எல்லாம் மேல்நாட்டுக் கவிதையின் தாக்கம்' என்று இந்நாளில் எளிதில் சொல்லிவிடுகிறார்கள். ஆனால், திருலோகம் எழுதியுள்ள கந்தர்வ கானத்தில் கருத்தும் சொற்றொடரும் அப்படி அப்படியே ஆங்கிலக் கவி மேதைகளின் கவிதைகளில் இருக்கின்றன என்ற வியப்பான செய்தியைப் படிக்கும்போது, ஆங்கில அறிவு போதுமானதாக இல்லாத திருலோகத்தின் கவிதை கருத்துகள் பிரான்ஸின் தாம்ஸனோ, டி.எஸ்.எலியட்டோ கூறியவற்றை நம் கவிஞர் எவ்வாறு கூறினார்? (1967). கவிஞர் திருலோகம் சொல்வதுபோல் நேரில் பாடிக் காட்டுவதிலும் கேட்பதிலும்தான் கவி இன்பம் முழுமை பெறுகிறது. கந்தர்வ கானத்தைக் கவிஞர் பாடியதைக் கேட்ட பிரமிப்பு எவ்வளவு முறை படித்தாலும் வராது என்பது உண்மையே''.

திருலோக சீதாராமை 20-ஆம் நூற்றாண்டின் புரட்சிக் கவிஞர் - புதுமைக் கவிஞர் - புதிரான கவிஞர் - பாரதி புகழ்ப் பரப்பிய கவிஞர் - பிறவி மேதை என்று எதைச் சொல்லிப் பாராட்டுவது?

திருலோக சீதாராம், 1973-ஆம் ஆண்டு ஆகஸ்டு 23-ஆம் தேதி தம் புகழுடம்பை நீத்தார். பாரதி புகழ் பரப்பிய அவர், நம்மிடையே என்றும் வாழ, நாம்தான் அவரது புகழைப் பரப்ப வேண்டும்.
நன்றி: தினமணி

"முருங்கை' - தமிழ்ச்சொல்லே!

2011-12-06T05:24:00.001-08:00

தமிழில் முருக்குதல், முறுக்குதல், முரி, முறி, கருப்பு, கறுப்பு போன்ற சொற்கள் நேர்பொருளும் நிழற்பொருளுமாய் ஒன்றின் ஒன்று மேவி வருகின்றன.

ஆங்கிலத்தில் இர்ய்க்ன்ஸ்ரீற் (கண்டக்ட்-நடத்துவது) என்ற சொல்லை, அதே எழுத்துக்கூட்டலில் "காண்டக்ட்' என ஒலித்தால், "நடத்தை' என்று பொருள்படுகிறது. இவை போல்வன மொழியின் இயல்புகள்.

முருக்குதல் - அழித்தல், கொல்லுதல். "மூங்கில் முருக்கி' - யானை மூங்கிலை வளைத்து அழித்து என்று பொருள். (அகம்:332) "மன் எயில் முருக்கி' - திண்ணிய மதிலை நெருக்கி அழித்து என்று பொருள். (சிறுபாண்-247) முறுக்கு - திரித்தல், சுற்றுதல். முறுக்கு உறுத்த - மரத்திரிகையைச் சுற்றுதல் செய்து (அகம்:224). "பிடியடி முறுக்கிய பெருமிப பூசல் - ஆண் யானை குழியில் அகப்படவே, பெண் யானை அதை மேலே ஏற்றுதற்குப் படியாக, ஒரு மரத்தை முறுக்கி ஒடித்துப் போடுகிறது (அகம்:224). முறுக்கி அழிக்கும் நிலை முருக்குதல் ஆகிறது.

முருங்கைக் காய், ஒரு கயிற்றை முறுக்கி விட்டதுபோல பல முடிச்சுகளையுடைய நீளமான காயாக இருப்பதால் அப்பெயர் பெற்றது. முருங்கையில் இருவகை உண்டு. ஒன்று முள் முருங்கை; மற்றது உணவுக்குதவும் முருங்கை.

""வைகுபுலர் விடியல் மைபுலம் பரப்பக்

கருநனை அவிழ்ந்த ஊழுறு முருக்கின்

எறிமருள் பூஞ்சினை இனச்சிதர் ஆர்ய

(அகம்:41)

விடியற்காலம். முருங்க மரத்தின் பெரிய அரும்புகள் முறுக்கு நெகிழ்ந்து மலர்ந்த, நெருப்பை ஒத்த சிவந்த மலர்கள். இது முள் முருங்கை என்று தெரிகிறது. இது அகன்ற இலைகளையுடையது. அம்புகள் எய்தால் "தச்சு தச்சு' என்று உள்ளே ஊடுருவி நின்றுகொள்ளும்.

""........ ........ அலங்குசினை

நாரில் முருங்கை நவிரல் வான்பூச்

சூரலங் கடுவளி எடுப்ப ஆரூற்று

உமைதிரைப் பிதிர்வில் பொங்கி முன்

கடல்போல் தோன்றல காடு .....

(அகம்-1)

அசையும் கிளையினையுடைய நாரில்லாத முருங்கையின் குலைந்துபோன வெள்ளிய பூக்கள், சூறாவளிக் காற்று வேகமாக வீசவே, ஆர்த்தலுற்று (ஓசையுடன்) எங்கும் உதிர்ந்து, பரந்து கிடக்கிறது. வெண்ணிற அலைகள் மோதும் கடற்கரைபோலக் காட்சியளிக்கும் காடு அது.

முருங்கை மரங்கள் பாலை நிலத்தில், வேனிற்காலத்தில் பூத்துக் குலுங்கும். முள் முருங்கை இலை அகலமானது, மற்றதன் இலை சிறியது.

இத்தகைய இடங்கள் பலவற்றைச் சங்கப் பாடல்களில் காண்கின்றோம். அதனால் காரணப் பெயரையுடைய "முருங்கை' தமிழ்ச்சொல்லே என்பது உறுதிப்படுகிறது. சிங்களம் இதை "முருங்கா' எனக் கடன் வாங்கியுள்ளது என்பதே உண்மை.

"முருங்கை' சிங்களச் சொல் என்று சிறந்த திறனாய்வாளரான ஆ.வேலுப்பிள்ளை தம் நூலில் எழுதியுள்ளதாக, கவிக்கோ ஞானச்செல்வன் (தினமணி கதிரில்) எழுதியுள்ளார். சிறந்த திறனாய்வாளரான ஆ.வேலுப்பிள்ளை, சங்கப் பாடல்களை நினைவு கூர்ந்திருந்தால், "முருங்கை' தமிழ்ச்சொல்லே என விளக்கியிருப்பார்!
நன்றி: தினமணி

விடை தேடும் உலகிலே...

2011-12-05T11:07:00.000-08:00

பல்லவி

விடை தேடும் உலகிலே நிலவே
விடுகதையாய் திரிகிறேன் உயிரே
எந்தன் நிழலும் நீயானதே மலரே
எதைச்சொல்லி உனை சேரவோ கொடியே.

விடை தேடும் உலகிலே நிலவே
விடுகதையாய் திரிகிறேன் உயிரே
எந்தன் நிழலும் நீயானதே மலரே
எதைச்சொல்லி உனை சேரவோ கொடியே.

சரணம்

அடியே உன் நட்புக்கு ஆயிரம் இதயங்கள் ஏங்குதடி
அடியேனுக்கு காதலாய் கனிந்துவிட்டால்-உனை
காவியங்கள் தாங்குமடி- உன்
எண்ணங்கள் தாங்கியே என் ஜீவன் வாழுதடி
ஒரு நொடி நீ பிரிந்தால் இமை மோதிக்கொள்ளுமடி
கண்மூடி இருளாய் போகுதடி இந்நொடி
எத்தனையோ கனவுகள் என் தூக்கத்தில்
வந்து வந்து கலைந்தாலும்- கலைவதில்லையடி
உன்னோடு வாழும் கனவு

பல்லவி

விடை தேடும் உலகிலே நிலவே
விடுகதையாய் திரிகிறேன் உயிரே
எந்தன் நிழலும் நீயானதே மலரே
எதைச்சொல்லி உனை சேரவோ கொடியே.

சரணம்

நீ பேசும் மொழிக்கு நான் தவமிருந்தேன்
உன் விழி அசைவில் நீ பேசும் மொழி அறிந்தேன்
எனக்குள்ளே உயிராக வளர்க்கிறேன்-உனை நான்
எனக்குள்ளே உயிராக வளர்க்கிறேன்
பிரிவொன்று வருமானால் உயிரே
ஜீவனற்று போகும் என் உடலே
உன் புன்னகை கண்டே பூக்களும் மலரும்
பூவொன்று உதிர்தாலும் மனம் அதிரும்
உனைச்சேராத பூக்களுக்கு மோட்சங்கள் உண்டோ

ஒரு பிரஜையின் குரல்-2

2011-12-05T05:59:00.000-08:00

டில்லி கோர்ட்டிலும் மற்றும் சில கோர்ட்டுகளிலும், "ரம்மி' என்ற காசு வைத்து விளையாடும் சீட்டாட்டம் தவறில்லை. அது ஒரு அறிவு சார்ந்த, திறமையான விளையாட்டு என, தீர்ப்பு கூறப்பட்டதாக செய்தி வெளியாகியுள்ளது. எந்த விதத்தில் இந்த சூதாடிகள் அறிவை வளர்த்துக் கொண்டனர், எந்த விதத்தில் திறமையை காட்டினர் என்பது தெரியவில்லை. கிளப் நடத்துபவர்கள், பெயருக்காக கேரம் போர்டு, டேபிள் டென்னிஸ், பில்லியர்ட்ஸ், சதுரங்கம் போன்ற விளையாட்டுகளை வைத்திருப்பர். ஆனால், 99 சதவீதம் பேர், ரம்மி ஆடி, காசு சேர்க்க வேண்டும் என்ற எண்ணத்தில் கிளப்புக்கு செல்வர். ரம்மி விளையாட வருபவர்கள், காசாளரிடம், 500 ரூபாய் கொடுத்து டோக்கன் வாங்க வேண்டும். ஒவ்வொரு மேஜைக்கும், கிளப் ஊழியர் கண்காணிப்பாளராக இருப்பார். இவருடைய வேலை என்னவென்றால், யார் வெற்றி பெறுகின்றனரோ, அவரிடமிருந்து, 10 ரூபாய் வாங்கிக் கொள்வார். இப்படி ஒவ்வொரு ஆட்டத்திலும் வெற்றி பெற்றவர், கொடுத்தாக வேண்டும். 12 ஆட்டங்கள் முடிந்தவுடன், 120 ரூபாய் உரிமையாளருக்கு சேரும். 12 சுற்றுகளில் அதிக பணம் பெற்றவர், வீட்டிற்கு செல்ல அனுமதிக்கப்பட மாட்டார். அவர் கண்டிப்பாக அடுத்த, 12 சுற்றுகள் விளையாடியாக வேண்டும். காலை 10 மணிக்கு, "ரம்மி' ஆட ஆரம்பித்தால், விடிய, விடிய விளையாடி, பணத்தை இழப்பவர்களும் இருக்கின்றனர். ஒரு சில சூதாடிகளுக்கு சூரியன் உதயமாவதும் தெரியாது, அஸ்தமனமாவதும் தெரியாது. திருமணமானவர்கள், அன்றாட வீட்டு செலவிற்கு கூட பணம் தர மாட்டார்கள். இந்த சூதாடிகளுக்கு, வட்டிக்கு கடன் தருபவர்களும் உள்ளனர். சம்பள தேதியன்று வட்டியை வாங்கிக் கொள்வர். பல குடும்பங்கள் அழிய, இது காரணம். "டாஸ்மாக்' செல்பவர் இரவில் சென்று, "கட்டிங்' என்ற முறையில் குடித்துவிட்டு திரும்பலாம். குதிரை பந்தயம் ஆடுபவர்கள், வாரம் ஒருமுறை சென்று பணத்தை இழப்பர். ஆனால், இந்த கிளப்புகளுக்கு செல்லும் நடுத்தர வர்க்கத்தினர், விட்டதை பிடிக்க வேண்டும் என்று வெறி பிடித்து, கடைசியில், விட்டத்தில் தான் தொங்குவர். அதாவது, தூக்கு போட்டுக் கொண்டு இறப்பர். முடிவாக, பனை மரத்திற்கு கீழ் நின்று பால் குடித்தாலும், கள் குடித்ததாகத்தான் நினைப்பர். ஆதலால், பனை மரம் பக்கமே போகாமல் இருப்பது, நடுத்தர வர்க்கத்தினருக்கு நல்லது! கே.விட்டல் ராவ், தலைமை ஆசிரியர் (பணி நிறைவு), சென்னை

முல்லைப் பெரியாறு: உண்மை சொல்லும் குறும்படம்

2011-12-03T22:29:00.001-08:00

டேம் 999' என்ற பெயரில் ஓர் ஆங்கிலப் படத்தை எடுத்து, முல்லைப் பெரியாறு அணையையே உடைக்கும் அளவுக்கு கேரள மக்களை தூண்டிக்கொண்டிருக்கிறார்கள் சிலர்.

ஆனால், உண்மையில் இந்த அணைக்கும், திருவாங்கூர் சமஸ்தானத்துக்குமே வரலாற்று ரீதியில் தொடர்பே இல்லை.

அந்தக் காலத்தில், திருவாங்கூர் சமஸ்தானத்துடன் 999 ஆண்டுகளுக்கு தவறாக ஒப்பந்தம் போட்டுவிட்டது ஆங்கிலேய அரசு. ஆனால், ஒரு காலத்தில் சேர நாட்டுப் பகுதியில் இருந்த பூனையாற்று சமஸ்தானம் எனும் தமிழ்ப் பகுதியை ஆண்ட, பூனையாற்று தம்பிரான் என்பவருக்குத்தான் முல்லைப் பெரியாறு பகுதியே சொந்தமாக இருந்தது.

இந்த பகீர் உண்மைகளை குறும்படமாக எடுத்து வெளியிட்டிருக்கிறது, தமிழ்நாடு பொதுப்பணித்துறை மூத்த பொறியாளர்கள் சங்கம்!

இந்தக் குறும்படத்தைப் பாருங்கள்... பகிருங்கள்.

குறும்படத்தைக் காண - http://www.youtube.com/watch?v=l7uJ1nhXZ_A

பழம்பெரும் இந்தி நடிகர் தேவ் ஆனந்த் மரணம்!

2011-12-03T22:27:00.001-08:00

லண்டன்: பழம்பெரும் இந்தி திரைப்பட நடிகரும், 'எவர்க்ரீன் ரொமான்டிக் சூப்பர்ஸ்டார்' என்று அழைக்கப்பட்டவருமான தேவ் ஆனந்த் மாரடைப்பால் காலமானார். அவருக்கு வயது 88.

கடந்த சில மாதங்களாக உடல் நலக் குறைவால் பாதிக்கப்பட்டிருந்த தேவ் ஆனந்த் மருத்துவப் பரிசோதனைக்காக லண்டன் வந்தார்.

இந்த நிலையில், லண்டனில் சனிக்கிழமை இரவு மாரடைப்பால் தேவ் ஆனந்த் மரணமடைந்ததாக, அவருடைய உறவினர்கள் தெரிவித்தனர். தேவ் ஆனந்தை லண்டனில் அவருடைய மகன் சுனில் பார்த்துக்கொண்டார்.

கடந்த 1946-ல் 'ஹம் ஏக் ஹெயின்' படம் மூலம் நடிகராக அறிமுகமான தேவ் ஆனந்த், 'ஜித்தி' என்ற படம் மூலம் 1947-ல் இருந்து சூப்பர்ஸ்டாராக வலம்வரத் தொடங்கினார்.

'பேயிங் கெஸ்ட்', 'பாஸி', 'ஜெவல் தீஃப்', 'சிஐடி', 'ஜானி மேரா நாம்', 'அமீர் கரீப்', 'வாரன்ட்' என தேவ் ஆனந்தின் வெற்றிப் படங்களின் பட்டியல் மிகவும் நீளமானது.

இந்திய சினிமாவுக்கு ஆற்றியப் பணியைச் சிறப்பிக்கும் வகையில், தேவ் ஆனந்துக்கு 2001-ல் 'பத்ம பூஷன்' விருதும், 2002-ல் 'தாதா சாகேப் பால்கே விருதும்' வழங்கி, இந்திய அரசு கெளரவித்துள்ளது.

100 இதழ்கள் வெளியிட்டு "உயிர்மை' சாதனை

2011-12-03T03:11:00.001-08:00

சென்னை: ""எழுத்தாளர்களிடையேயான சண்டை மனித உறவை பாதிக்கக் கூடாது'' என, மூத்த எழுத்தாளர் இந்திரா பார்த்தசாரதி கூறினார்.
உயிர்மை 100வது இதழ் வெளியீட்டு விழாவுக்கு, தலைமை வகித்து, அவர் பேசியதாவது:
இலக்கிய இதழ்கள் இடைவெளி இல்லாமல், ஐந்தாண்டுகள் வெளி வந்தாலே, அது வெற்றி பெற்றதாகக் கருதப்படுகிறது. உயிர்மை இதழ் 100 இதழ்கள் வெளிவந்துள்ளது வரவேற்கத்தக்கது.சிறு பத்திரிகைகள் இலக்கியம், அரசியல், சமூக பிரச்னைகள் என, அனைத்தையும் உள்ளடக்கி வெளி வருகின்றன. இதில், விவாதிக்கப்படும் கருத்துகள் புதிய தகவல்களை வெளிக்கொண்டு வருகின்றன.எழுத்தாளர்களிடைய ஏற்படும் கொள்கை வேறுபாடுகள், கருத்து விவாதங்கள் வளர்ச்சிக்கே வழிவகுக்கின்றன. இது, ஆரோக்கியமான சூழலை ஏற்படுத்துகிறது. ஆனால், எழுத்தாளர்களிடையே ஏற்படும் சண்டை, மனித உறவை பாதிக்கக் கூடாது. வளர்ச்சிக்கு மட்டுமே அது உதவ வேண்டும்.இவ்வாறு இந்திரா பார்த்தசாரதி கூறினார்.உயிர்மை இதழின் ஆசிரியர் மனுஷ்ய புத்திரன் பேசியதாவது:இலக்கியம், சமூகம் சார்ந்த விவாதங்களுக்கு, உயிர்மை இதழ் தொடர்ந்து வாய்ப்பளித்து வருகிறது. புதிய எழுத்தாளர்களுக்கு வாய்ப்பு அளிப்பதால், நாட்டின் கடைகோடி பகுதியை சேர்ந்த, அடையாளம் தெரியாதவர்களைக் கூட வெளிக்கொண்டு வரும் வாய்ப்பு, உயிர்மை இதழின் மூலம் கிடைத்துள்ளது.இவ்வாறு, மனுஷ்ய புத்திரன் பேசினார்.உயிர்மை இதழின் 100வது இதழை, மூத்த எழுத்தாளர் இந்திரா பார்த்தசாரதி வெளியிட, எழுத்தாளர் ராமகிருஷ்ணன் பெற்றுக்கொண்டார். உயிர்மை பதிப்பகத்தின் கவிதை நூலான, "காற்றால் நடந்தேன்' விழாவில் வெளியிடப்பட்டது. கவிஞர் தமிழச்சி தங்கப்பாண்டியன், ஷாஜி உள்ளிட்டோர், வாழ்த்திப் பேசினர். நூல் ஆசிரியர் இயக்குனர் சீனு ராமசாமி ஏற்புரை வழங்கினார்.

நடிகை சில்க் ஸ்மிதா வாழ்க்கை பற்றி திரைப்படம்

2011-12-02T10:55:00.001-08:00

தென்னிந்தியத் திரையுலகின் கனவுக் கன்னியாகத் திகழ்ந்த காலஞ்சென்ற சில்க் ஸ்மிதாவின் வாழ்க்கையை அடிப்படையாகக் கொண்டு எடுக்கப்பட்டுள்ள ஹிந்தி திரைப்படம் வெள்ளியன்று வெளியிடப்பட்டுள்ளது.

1979ல் வண்டிச் சக்கரம் என்ற தமிழ்ப் படத்தில் மதுபான விடுதி மங்கையாக வந்து ரசிகர்களின் மனதில் இடம்பிடித்த நடிகை விஜயலட்சுமி சில்க் ஸ்மிதாவாக மாறிப்போனார்.

கிறங்கவைக்கும் உடல் வனப்புக்கும் மயக்கம் தரும் பார்வைக்கும் சொந்தக்காரியாக விளங்கிய சில்க் கொஞ்சம் கொஞ்சமாக தென்னிந்தியத் திரையுலகின் கவர்ச்சி ராணியாக உருவெடுத்தார்.

படம் வெற்றி பெற வேண்டுமானால் சில்க் ஸ்மிதா திரையில் தோன்றுவது அவசியம் என்ற ஒரு காலகட்டம் தென்னிந்திய சினிமாவில் இருந்தது.

தென்னிந்தியத் திரையுலகில் வெற்றிக்கொடி நாட்டிய பின்னர் ஹிந்திப் படங்களிலும் இவர் நடித்துள்ளார்.

கவர்ச்சிக் குத்தாட்டம், சின்னச் சின்ன வேடங்கள் என 400க்கும் மேற்பட்ட படங்களில் அவர் நடித்துள்ளார்.

புகழும் பணமும் அங்கீகாரமும் இருந்தாலும், சக நடிகர்களின் தயாரிப்பாளர்களின் பாலியல் வக்கிரங்களுக்கு ஆளாகி சில்க் ஸ்மிதாவின் வாழ்க்கை சீரழிந்து வந்ததாக பேச்சு அடிபட்டு வந்தது.

இந்நிலையில் வெறும் 35 வயதே ஆன சில்க் ஸ்மிதா, ஒரு நாள் அவரது படுக்கையறையில் சடலமாகக் கிடந்தார்.

அவர் தற்கொலை செய்துகொண்டதாகக் கூறப்பட்டது.

"டர்ட்டி பிக்சர்" திரைப்படத்தில் வித்யா பாலன் சில்க் ஸ்மிதாவாக வருகிறார்.

இதயத்தைக் காணவில்லை...

2011-12-02T09:08:00.001-08:00

கஜினி முகமது மாதிரி, முயற்சியின் விளிம்பு வரை மோதிப்பார்த்த மனிதன் இங்கு யாரும் இல்லை. முயற்சியை சுவாசமாக்கி, வெற்றியின் நெற்றியில் முத்தமிட்டவன் அவன்தான். காயங்களைக் கவசமாகவும், அவமானங்களை மகுடமாகவும் மாற்றிக்காட்ட அவனால்தான் முடிந்தது. பள்ளி வயதில் பெரும்பாலான பொழுதுகளை நூலகத்திலேயே கழித்தேன். பாடசாலையை அடுத்து நூலகமே எனக்கு விருப்ப இடமாக அமைந்தது. மு.வவையும், ஜெயகாந்தனையும், புதுமைப்பித்தனையும் அங்குதான் படித்தேன். பாரதிதாசனின் பகுத்தறிவுக் கருத்துகளும், கண்ணதாசனின் திராவிடச் சிந்தனைகளும், வைரமுத்துவின் சொல்லாட்சிகளும் என்னை வாரிச்சுருட்டி வசீகரித்த பொழுதுகள் அவை.

நாளொன்றுக்கு ஒரு இலக்கிய நூலை வாசிக்கும் வழக்கத்தை எனக்கு ஏற்படுத்தியவர், விடுதிக் காப்பாளர் பென்னாடம் மேகராசன். பதிமூன்று வயதில் அறுசீர் மற்றும் எண்சீர் விருத்தங்களும், வெண்பாவும் எழுதக் கற்றுக்கொண்டேன். தமிழ்மீது எனக்கு இருந்த அதீதமான காதல்தான் பாட்டுத்துறைக்கு என்னைக் கைப்பிடித்து அழைத்து வந்தது.
பச்சையப்பன் கல்லூரியில் இளங்கலை தமிழ் இலக்கியம் சேர்ந்த பின், ஒருபுறம் பாட்டு முயற்சி. மறுபுறம் பட்டினியின் தொடர்ச்சி. அந்த வறுமை நாட்களில் நண்பர் தாஸ்ராஜ் நட்பின் கரமும், என் பால்ய நண்பர்கள் என்.குமரவேல், எம்.தங்கதுரை ஆகியோரின் தோழமைத்தோளும் என்னைத் தூக்கிச் சுமந்தன. மூவரின் நட்பும், இவர்கள் எனக்கு இட்ட உப்பும் என் பாட்டு முயற்சிக்கு பக்கபலமாக அமைந்தது. கவிதைக்கனவும், பாட்டுத் தேடலும் பற்றிப் படர்ந்த அந்த நிராதரவற்ற காலத்தில், ஓவியர் உபால்டு எனக்கு அளித்த அடைக்கலமும், அன்பும், ஆதரவும் வெறும் வார்த்தைகளில் வடிக்க முடியாதவை. பாட்டு வாய்ப்புக்காக பல்வேறு இடங்களில் எனக்கு அவர் பரிந்துரை செய்தார். ‘இளையகம்பன்’ என்று பெயர் சூட்டியவரும் அவர்தான்.

ஆறு வருட கால கடுமையான முயற்சிக்குப் பிறகுதான், தயாரிப்பாளர் சூப்பர் குட் பிலிம்ஸ் ஆர்.பி.சவுத்ரி பாடல் எழுத வாய்ப்பு அளித்தார். கே.பாக்யராஜ் திரைக்கூடத்தில் உருவான இயக்குநர் கவி.காளிதாஸ், ‘உன்னை கொடு என்னை தருவேன்’ படத்தில், என்னைப் பாடலாசிரியராக அறிமுகம் செய்தார். கவி.காளிதாஸ் அற்புதமான இயக்குநர். மேன்மை குணம் நிறைந்த மனிதர். பல சிரமங்கள் ஏற்பட்ட நிலையிலும், என் பாட்டுத்தவத்தை அவர் பெரிதும் நேசித்தார்.
ஒவ்வொரு நாளும் எனக்கு ஒரு மெட்டு கொடுத்து எழுதச் சொல்வார். நெடிய போராட்டத்துக்குப் பின், எனக்குக் கிடைத்த இந்த வாய்ப்பு பறிபோய்விடக் கூடாது என்று, ஒரு மெட்டுக்கு பலமாதிரி எழுதிக் காட்டுவேன். இதுவே வாடிக்கையானது.

தஸ்தாவெஸ்கி எழுதிய ‘வெண்ணிற இரவுகள்’ என்ற சிறுகதையிலுள்ள காதலின் வலியைப் போன்று, எனக்கு சொல்லப்பட்ட பாட்டுச்சூழலில் வலிகளும், வலிமையும் நிறைந்த ஒரு ராணுவ வீரனின் முதல் காதலையும், அதன் பரவசத்தையும் எழுதுவதாக அமைந்தது. அற்புதமான ஒரு மெட்டை இசையமைப்பாளர் எஸ்.ஏ.ராஜ்குமார் அமைத்திருந்தார். இசைத்துறையில் பல உயரங்களை அடைந்த அவர், என்னைப் போன்ற பல இளைய தலைமுறைக் கவிஞர்களை வாழ்த்தி வரவேற்பார். நயாகரா அருவி மாதிரி, ராஜ்குமாரின் இசைப்பெட்டி வற்றாத மெல்லிசையை வழங்க வல்லது.

இந்தப் பாடலுக்கு நிறைய பல்லவிகளையும், சரணங்களையும் எழுதிக் கொடுத்தேன். இயக்குநரும், இசையமைப்பாளரும் இறுதியில் இந்த பல்லவியைத்தான் தேர்வு செய்தனர்.
இதயத்தைக் காணவில்லை & அது
தொலைந்தும் நான் தேடவில்லை
கண்டேன் அழகிய கொலுசு கொலுசு
திருகாணி ஆனது மனசு மனசு
இந்நாள் அனுபவம் புதுசு புதுசு & அவள்
பாதக் கொலுசொலி கேட்கும்போது
இதயத்தைக் காணவில்லை
என்ற பாடல் வரிகள், இயக்குநரின் உதவியாளர்களுக்கு மிகவும் பிடித்திருந்தது. சவுத்ரி என்னைப் பாராட்டிவிட்டு, ஒரு திருத்தம் சொன்னார். பாடலின் தொகையறாவில், ‘முற்றும் துறந்த முனிவனைக்கூட மூழ்க வைக்கின்ற வெள்ளமன்றோ’ என எழுதியிருந்தேன். இதைச் சுட்டிக்காட்டிய அவர், ‘‘முற்றும் துறந்த’ என்று பாடல் தொடங்க வேண்டாம். வேறு வரிகளை எழுதுங்கள்’ என்றார். முதல் பாடலை எழுதும் என்மீது அவருக்கு இருந்த அதீதமான அக்கறையை இது காட்டியது, அவர் சொன்ன ஒரு திருத்தம். ‘வானில் இருந்து வானவில் ஒன்று மண்ணில் இறங்கி வந்ததுவோ’ என்று மாற்றி எழுதினேன். மகிழ்ந்தார்.

‘பல்லவன் உளிகள் கூடி செதுக்கிய சிலைதானா/ பிரம்மனும் சிலையைப் பார்த்து ஜீவனைக் கொடுத்தானா’ என்று, சரணத்தில் எழுதியிருந்தேன். பாடலைக் கேட்ட அஜீத்குமார், படப்பிடிப்புத் தளத்துக்கு என்னை வரவழைத்துப் பாராட்டினார். என் முதல் பாடலே அவருக்குத் திருப்திகரமாக அமைந்ததில், எனக்கு தனிப்பட்ட மகிழ்ச்சி. ஏனெனில், தன்னம்பிக்கையின் மொத்த உருவமாக தன்னை வார்த்துக்காட்டி, திரையுலகில் வெற்றிபெற்றவர் அவர். திரைத்துறையில் சாதிக்கத் துடிக்கும் நிறைய இளைஞர்களுக்கு ‘முன்மாதிரி’யாகவும் திகழ்கிறார்.
மல்லாபுரம் கிராமத்தில் இருக்கும் என் தந்தை அருணா

சலத்திடம் இருந்து, எனக்கான போராட்ட குணத்தை கற்றுக்கொண்டேன். அவர் நன்கு உழைத்த, இன்னும் உழைத்துக் கொண்டிருக்கும் ஆற்றலில் சில சதவீதங்கள் கூட இன்னும் நான் செலவிடவில்லை. எளிய விவசாயியான அவர், இந்த வாழ்க்கையை வென்று காட்ட இன்றுகூட சேற்றோடும், நாற்றோடும் கடுமையாக போராடிக் கொண்டிருக்கிறார். அவர் படிக்கவில்லை. ஆனால், நான் கல்லூரி வரை செல்வதற்கு அவர்தான் காரணமாக இருந்தார். மண்வெட்டியையும், களைவெட்டியையும் தன் கையில் பிடித்தார். என் கையில் எழுதுகோல் கொடுத்தார்.
இன்று என்னைப்போன்ற இளைய தலைமுறை கவிஞர்கள், திரையில் தங்கள் திறமைகளை நிரூபித்து வருகிறார்கள் என்றால், அதன் முழு பெருமையும் இயக்குநர்களைத்தான் சேரும். அவர்கள்தான் வாய்ப்புகளை வாரித்தந்து, வளமான புதிய கவிஞர்களை வளர்த்து வருகிறார்கள். அந்த வாய்ப்பை, புதுமுக இயக்குநராக இருந்த கவி.காளிதாஸ் எனக்கு வழங்கினார். போராடி வெல்கிற வெற்றியும், அதற்கு அடிப்படையாக இருக்கும் வலியையும் இயக்குநர்களும், உதவி இயக்குநர்களும் நன்கு உணர்ந்தவர்கள்.
முதல் பாட்டு வாய்ப்புக்குப் பின், கடந்த பத்து வருடங்களில் பல பாடல்களைக் கடந்துவிட்டேன். என்றாலும், பாட்டு வாய்ப்புக்காக நான் பயணம் செய்த தூரமும், துயரமும் நீளமானது. போராட்டம் இல்லாமல் வாழ்க்கை இல்லை. போராடிப் பார்த்தால்
தோ ல்வி இல்லை.
(உலா வரும்)
நன்றி: தினகரன்

கருவாப்பையா... கருவாப்பையா...

2011-12-02T09:07:00.000-08:00

பெரியாரும், அம்பேத்கரும் இல்லாது போயிருந்தால், சிவப்பு இருளிலிருந்து கருப்புத்
தமிழன் மீட்கப்படாமலே போயிருப்பான். இவர்கள் இருவரும் அடித்த சம்மட்டி அடியில்தான், அடிமை விலங்குகளின் பூட்டுகள் தெறித்துச் சிதறின.
கருப்பு என்பது, புரட்சியின் வடிவம். கருப்பு என்பது, போர்க்குணத்தின் கருப்பை. கருப்பு, வீரத்தின் முத்தம். கோபத்தின் பாடசாலை. உழைப்பின் புன்னகை. பூமியில் கருப்புநிற மலர்கள் இல்லாமல் இருக்கலாம். ஆனால், பூமி உருண்டையில் பாதி விழுக்காடு கருப்புதான்.
மண்டேலா, மார்ட்டின் லூதர்கிங், சேகுவாரா, மால்க்கம் எக்ஸ்... இவர்கள் எல்லாம் கருப்பு நிறத்தின் விடுதலை நெருப்பாய் வெளிப்பட்டவர்கள். தமிழனின் நிறமும், தமிழ்மண்ணின் நிறமும் கருப்பு என்பதால், கருப்பு என்றாலே எனக்கு அதிக விருப்பு. கருப்பின் வாசகன் நான். கிளியோபாட்ராவுக்கு அழகையும், கண்ணகிக்கு ஆவேசத்தையும் வழங்கிய வண்ணம்... கருப்புதான்.
கருப்பு மனிதர்களின் வீரத்தையும், ஈரத்தையும் பிரதிபலிக்கும் கதையம்சம் கொண்டதுதான், நான் பாடல் எழுதிய ‘தூத்துக்குடி’ படம். அந்தப் படத்துக்கான அனைத்துப் பாடலையும் எழுதும் பொறுப்பை எனக்கு அளித்தார், இயக்குநர் சஞ்சய்ராம்.

அவர் ஒரு பாட்டுக்காதலர். ஒரு தேனீயைப்போல் எந்த நிலையிலும் உழைத்துக்கொண்டே இருக்கும் சுறுசுறுப்பான மனிதர். நம்பிக்கை வற்றிவிடாமல் பயணப்பட்டுக்கொண்டே இருக்கின்ற நதி போன்றவர். பச்சையப்பன் கல்லூரியில் நான் இளங்கலைத்தமிழ் இலக்கியம் படித்து முடித்த பருவத்தில் இருந்தே எனக்குப் பரிச்சயமானவர்.

‘தூத்துக்குடி’ படத்தில் சஞ்சய்ராமின் முயற்சிகளுக்கு எல்லாம் முதுகெலும்பாய் நின்றவர், அந்தப் படத்தின் தயாரிப்பாளரும், நாயகனுமான ஹரிகுமார். சஞ்சய்ராம் சற்று வித்தியாசமானவர். தன் படங்களுக்கு எப்போதும் கவிஞர்கள் பாடல் எழுதிய பிறகே மெட்டமைத்துப் பழக்கப்பட்டவர்.படத்தின் கதைச்சூழல் பற்றி அவர் சொல்லும்போது, ‘இது ஒரு கருப்பு மனிதர்களின் கண்ணீர்த்துளி’ என்றே என்னிடம் பதிவு செய்தார். அவர் படங்களுக்கு நான் பாடல் எழுதுகின்ற தருணங்களில், எப்போதும் என்னுடனேயே இருப்பது அவரது வழக்கம்.
சிலநேரங்களில் மின்னல் துண்டுகள் மாதிரி,

சின்னச்சின்ன ஆலோசனைகள் சொல்வார். சிலநேரங்களில் நான் வருவதற்கு தாமதம் நிகழ்ந்துவிட்டால், தாளெடுத்து அவரே எழுத ஆரம்பித்துவிடுவார். அவரிடமுள்ள அற்புதமான பழக்கம் இது.இந்தப் படத்திற்கான ஐந்து பாடலையும் நான் எழுதி முடிப்பதற்குள், சரியாக ஐந்து மாதங்களாகி விட்டன. அவ்வளவு சுலபத்தில் அவர் திருப்தி அடைவதில்லை. திடீரென்று, இரவு ஒரு மணிக்கு தொலைபேசியில் தொடர்புகொண்டு, ‘பல்லவி தயாரா?’ என்பார்.

இதுவாவது பரவாயில்லை. அதிகாலை நான்கு மணிக்கு அழைத்து, ‘தயாராக இருங்கள். இசையமைப்பாளர் வரச் சொல்லியிருக்கிறார். பாலவாக்கம் செல்ல வேண்டும்’ என்பார். அவருடைய தேடல் இது. ஒவ்வொரு பாடலும் பிரசவம் போன்றதுதான். வலிகளுக்கு நடுவேதான் வசந்தம் மலர்கிறது. சில கனிகள், ஒரே ஒரு கல்லில் விழுகிறது. சில கனிகளுக்கு மரம் ஏற வேண்டியிருக்கிறது.

பாடல் எழுத அமர்ந்தபோது, கவிதைநயம் மிகுதியாய்க் கலந்துவிடாமல், எளிமையான சொற்கள் தொடுத்து இந்தப் பாடலை எழுத வேண்டும் என்று முடிவு செய்தேன். எளிமையை வடிவமைப்பதும், எளிமையைக் கடைபிடிப்பதும்தான் இங்கே எப்போதும் கடினமான ஒன்று.திரைத்துறையில் பாதம் பதித்து, மிகக்குறுகிய காலகட்டத்திலேயே பொதுவுடமைக் கருத்துகளை எளிமையாய் பாட்டில் வடித்துத் தந்தவர், பட்டுக்கோட்டை கல்யாணசுந்தரம். இந்தச் சமூகத்தை, அரசியலை, சமத்துவத்தை அவரைப்போல் பாட்டில் பதிவு செய்த பாவலன் எவருமில்லை.
பச்சையப்பன் கல்லூரிக்காலங்களில், கலைஞர் எழுதிய ‘தேனலைகள்’, பொதுவுடமை கவிஞர் கே.ஜீவபாரதி தொகுத்த ‘பட்டுக்கோட்டையார் பாட்டுத்தொகுப்பு’ நூல்கள் என் கைகளில் தவழ்ந்தவண்ணம் இருக்கும். ஆடு, மாடுகள் மேய்த்த கிராமத்துப் பொழுதுகளில், பட்டுக்கோட்டையாரின் ‘சின்னப்பயலே சின்னப்பயலே... சேதி கேளடா...’ பாடல்தான் எனக்கு தேசியகீதம்.
அரும்புமீசை முளைக்கும் முன்பே, கவிஞர் சுரதாவின் அரவணைப்பு எனக்குக் கிடைத்தது. எளிமையின் உருவமாக வாழ்ந்த கண்ணதாசனின் உதவியாளர் இராம.கண்ணப்பனின் அன்பும், கவிஞர் முத்துலிங்கம் மற்றும் மு.மேத்தாவின் நேசத்தையும் பெற்று வளர்ந்த பிள்ளை நான். இவர்களின் எளிமையும், நான் படித்த பாடங்களுள் ஒன்று.

எளிமையையும், கதைச்சூழலில் வருகின்ற கருப்பு மனிதர்களின் கருமையையும் குழைத்து எடுத்த வார்த்தையாகத்தான் உருவானது, இந்தப் பல்லவியின் தொடக்க வரி.
கருவாப்பையா.. கருவாப்பையா
குண்டூசி மீசக்குத்தி
மேலுதடு காயமாச்சி
கிறுக்குப்பய பல்லுபட்டு
கீழுதடு சாயம்போச்சி...
என்று, இந்தப் படத்தின் கதைக்குப் பொருத்தமான பல்லவியாய் அமைந்துவிட்டதாக சஞ்சய்ராமும், ஹரிகுமாரும் பரவசப்பட்டார்கள். அத்துடன் நின்றுவிடாமல், இதை இனிமையான மெட்டுக்குள் வசப்பட வைக்க பிரயத்தனப்பட்டோம். அதற்கேற்றவாறு இசையமைப்பாளர் பிரவீன் மணி ஒத்துழைப்பு நல்கினார். அதற்குமுன் பிரவீன் மணி, ‘ஒற்றன்’ படத்துக்காக பா.விஜய் எழுதிய பிரபலமான ஒரு பாடலைக் கொடுத்திருந்தார்.
பெரும்பாலும் நான் எழுதுகின்ற பாடலில், சரியான வாய்ப்பு அமையும்போது, கதைச்சூழல் விலகாதவாறு ஏதாவது ஒரு சமூகக்கருத்தை பதிவு செய்வதை என் கடமையாகவே நினைக்கிறேன். எந்தப் பாடலும் வெற்றுப்பாடலாய் அமைவதில் எனக்கு விருப்பமில்லை. இந்தப் பாடலில் கூட, சமூகத்தால் புறக்கணிக்கப்பட்ட நாயகன், தன்னைப்பற்றி தன் காதலியிடம் பாடும்போது,
ஒதுக்கப்பட்ட கல்லு இவன்
மூலக்கல்லா ஆகிடத்தான்
காதல் என்னும் உளிவச்சி ஒடைச்ச...
என்று எழுதியிருப்பேன். பைபிள் வாசகத்தில் இருந்து எடுத்துக் கையாளப்பட்ட இந்த வரிகள் கதைக்குப் பொருந்தியும், அதேநேரத்தில் ஒடுக்கப்பட்ட, நசுக்கப்பட்ட மக்கள் சமூகத்தலத்தில் உயர்ந்து வரவேண்டும் என்ற கருத்தையும் வலியுறுத்துவதாக அமைந்தது. பாடகி சித்ராவின் தேன்குரலும், பாடகர்
திப்புவின் செழுமையான குரலும் இப்பாடல் பிரபலமாய் உலா வருவதற்குப் பேருதவி செய்தன.
பாட்டுக்கடலில் மூழ்கி, மூழ்கி முத்தெடுக்க முயல்கிறேன். கைகள் நிறைய கிளிஞ்சல்களும், எப்போதாவது சில முத்துக்களும் கிடைக்கின்றன. அந்தவகையில், ‘கருவாப்பையா...’ பாடல் எனக்குக் கிடைத்த ஒரு நல்முத்து எனலாம்.
(உலா வரும்)

நன்றி: தினகரன்

ரஹ்மான் கொடுத்த நம்பிக்கை

2011-12-02T09:06:00.000-08:00

அன்பைப்போல் பூமியை வெல்லும்
ஆயுதம் இங்கு வேறொன்றுமில்லை.
அன்பைப்போல் புனிதம் இங்கு
ஏதுமில்லை. ஒவ்வொரு நாளும்
அன்புதான் உலகப்பந்தை சுழற்றுகிறது.
ஓரறிவில் இருந்து ஆறறிவு வரை உயிரின் இதயங்களை அன்புதான்
மலர்த்துகிறது. அன்பு இல்லாத வாழ்க்கை ருசிப்பதில்லை. அன்பு
இல்லாத வேட்கை பசிப்பதில்லை.
வள்ளுவன் உரைத்ததுபோல்,
அன்பு மட்டுமே வாழ்க்கையின்
மூலதனமாயிருக்கிறது. வள்ளலார்
சொன்னதுபோல், அன்பே மானுடத்தின்
ஆணிவேராய் இருக்கிறது.

பூக்கள் நிறைந்த இந்த பூமி, எத்தனையோ போர்க்களங்களைக் கண்டிருக்கிறது. சர்வாதிகாரத்தால் சரித்திரங்களும், சாம்ராஜ்யங்களும் எத்தனையோ சரிந்திருக்கின்றன. ஆனால், அன்பினால்

எழுப்பப்ப ட்ட, எழுதப்பட்ட வரலாறுகள் மட்டுமே இன்னும் அசையாமல் நிற்கின்றன. மலர்களைப் பறிக்கும் கைகளில், மகரந்தம் ஒட்டுகிறது. முட்களைப் பறிக்கும் கைகளில், ரத்தம்

சொட்டுகிறது. எதை நாம் தேர்ந்தெடுக் கிறோமோ, அதுவே நம்மை வழிநடத்துகிறது. அப்படி அன்பைத் தேர்ந்தெடுத்து, இன்று உலகப்புகழ் பெற்று விளங்கும் ஒருவர், இரண்டு ஆஸ்கார்

விருதுகளை கைகளில் ஏந்தி வந்த தமிழர், ஏ.ஆர்.ரஹ்மான். எழுபத் தைந்து ஆண்டுகளாக இந்திய சினிமாவுக்கு கிடைக்காத அளப்பரிய அங்கீகாரம், ஒரு தமிழனால் கிடை த்தது.

பீத்தோவனும், மொசார்ட்டும் இன்று இருந்திருந்தால், இந்த இசைக்கலைஞனின் கன்னத்தில் முத் தமிட்டு, கைகுலுக்கி வாழ்த்தியிருப்பார்கள்.
ரஹ்மான் இசையில் நான் பாட்டுப்பணி செய்த நாட்கள் பரவசமானது. அவரோடு கவிதை பேசிக்களிக்கும் நிமி டங்கள், கற்கண்டைப் போன்றது. பாட்டுத்துறைக்கு வந்து இரண்டாம்

ஆண்டிலேயே அவர் இசையில் எழுதும் வாய்ப்பு எனக்குக் கிடைத்தது. வாலி, வைரமுத்து, பழனிபாரதி இவர்களுக்கு அடுத்து தன் இசையில் பாட்டெழுதும் ‘தாயன்பை’ ரஹ்மான்

எனக்களித்தார். 23 வயதிலேயே நான் பெற்ற இந்த அங்கீகாரம், திரைத்துறையில் ஒரு கவிஞனாக வெற்றிகொள்வதற்கு நான் கண்ட அவமானங்களுக்கும், காயங்களுக்கும் அருமருந்தாக

மாறியது. இந்த அரிய வாய்ப்பை எனக்கு அழைத்துக் கொடுத்தவர், இயக்குநர் அழகம் பெருமாள். மணிரத்னம் பாசறை யில் பட்டைத் தீட்டப்பட்ட அற்புதமான வைரங்களுள் அழகம்

பெருமாளும் ஒருவர்.

ஒரு மார்கழி மாதத்து மாலை. மேற்கின் உண்டியலில் அந்திச்சூரியன் மெல்ல விழும் நேரம். ‘வெற்றிப்பட இயக்குநர்’ கே.எஸ்.ரவிகுமார் அலுவலகத்தில் இருந்து எனக்கு அழைப்பு.

அழைப்பு வந்த அரை மணி நேரத் திற்குள், அவரது அலுவலகத்தில் நான். அவர் இருக்கும் இடத்தை உதவியாளர் எனக்குத் தெரிவித்தார். இயக்கு நரைச் சந்தித்த இடம் அறை அல்ல, தரை.

பூக்கள் பூத்துக்குலுங்கும் புல்தரை. மூன்றாம் தளத்தின் மொட்டை மாடி. பவுர்ணமி நிலா பால்சிந்தும் வேளை. அரைக்கண்ணால் பார்க்கும் மின்விளக்குகளின் ஒளியில், சின்ன புல் தரையில்

ரவிகுமார் சிம்மாசனமிட்டு அமர்ந்திருந்தார். கைகூப்பி ‘வணக்கம்’ தெரிவித்தேன். எழுந்து நி ன்று கைகொடுத்து, தன்னெதிர் இருக்கையில் என்னை அமர வைத்தார்.

‘‘உங்களைப் பற்றியும், உங்கள் பாட்டுத்திறன் பற்றியும் ரஹ்மான் என்னிடம் சொன்னார். நான் இயக்கும் ‘தெனாலி’ படத்தில் நீங்கள் பாடல் எழுத பரிந்துரை செய்திருக்கிறார். படத்தின்

நாயகன் கமல்’’ என்றார். இதைக்கேட் டதும், உடம்பிலுள்ள செல்களில் எல்லாம் எனக்கு சிறகு முளைத்தது. ‘‘ரஹ்மானும், நானும் உங்கள் மீது நம்பிக்கை வைத்திருக்கிறோம்.

நிறைவேற்றுவீர்கள் என்று நம்புகிறோம். வாழ்த்துக்கள்’’ என்று கூறி, பாடலுக்கான சூழ லைச் சொன்னார். அவர் உரைத்த பாடலுக்கான சூழலில், அதைத்தாங்கி நிற்கும் கதைக்களத்தில்,

கடல் கடந்து துன்பப்படும் தமிழ் இனத்தின் துயர் இருந்தது. கைக்கெட்டும் தூரத்தில் அடக்குமுறையால் கண்ணீர் சிந்தும் தொப்புள்கொடி சொந்தத்தின் சோகம் இருந்தது.

ஒரு மணி நேர சந்திப்புக்குப் பின், இயக்குநரிடம் இருந்து விடைபெற்றேன். ‘‘ரஹ்மான் ஒலிப்பதிவுக்கூடத்தில் நாளை மெட்டு வாங்கிக்கொள்ளுங்கள். என் அலுவலகத்தில் உணவு

இருக்கிறது. சாப்பிட்ட பின் செல்லுங் கள்’’ என அன்புக்கட்டளை இட்டார். இங்கு ஒன்றை நான் உரைத்தாக வேண்டும். வடலூரைப்போல் ரவிகுமாரின் அலுவலக சமையல் அறையும்,

அதில் ஏற்றும் உலையும் ஓய்வு கொண்டதில்லை. ‘தனியொருவனுக்கு உண வில்லையெனில் ஜகத்தினை அழித்திடுவோம்’ என்றான் பாரதி. அதையும் ஒரு படி தாண்டி, தான் தொடங்கி, தன்

சக உதவியாளர் வரை அங்கு சமத்துவ உணவை இயக்குநர் வழங்குகிறார் என்றறிந்தபோது, அவர்மீது இருந்த மதிப்பு என்னில் பலமடங்கு உயர்ந்தது.

அடுத்தநாள் காலை, ரஹ்மானை சந்திக்கிறேன். இதமான தேநீருக்குப் பின், ‘தெனாலி’ படத்தின் மெட்டை என்னிடம் அளித்தார். ‘‘கம்பன்... இது சவாலான மெட்டு. எழுதுவதற்கு கொஞ்சம்

கடினமாக இருக்கும். ஆனால், உங்கள் சுதந்திரத்திற்கு ஏற்றவாறு எழுதுங்கள். நல்ல வரிகள் அமைந்துவிட்டால், அதற்கேற்ப நான் சந்தத்தை மாற்றிக்கொள்கிறேன்’’ என்றார். இந்தப்

பெருந்தன்மைதான் ஆஸ்கார் வரை அவரை அழைத்துச் சென்றது. இந்த பரந்த அன்பின் வெளிப்பாடுதான் அமெரிக்கன் மேடையில் அன்னைத்தமிழைப் பேச வைத்தது. இளைய ராஜாவிற்கு

அடுத்து, இசைப்பாட்டில் புதிய மலர்ச்சியும், புதிய சொல்லாடலின் எழுச்சியும் ரஹ்மானால் தான் தோற்றுவிக்கப்பட்டன.

ஒரு வார கால அவகாசத்தில் எழுதிய பாடலை ஒலிப்பதிவுக்கூடத்திற்கு எடுத்துச் செல்கிறேன். பாடலைப் படித்துப் பார்த்த ரஹ்மானும், ரவிகுமாரும் திருப்திப்பட்டதாய்த் தெரியவில்லை.

‘‘இன்னும் வேறுமாதிரி வேண்டும். புதிதாக முயற்சி செய்யுங்கள். உங்களால் முடியும். நாளை மாலை ஒலிப்பதிவு’’ என்று, மெல்லிய புன்னகை ஒன்றை ரஹ்மான் உதிர்த்தார். மறுநாள்

மாலை. பதட்டத்தையும், பாடலையும் சுமந்தவாறு ஒலிப்பதி வுக்கூடத்தில் அமர்ந்திருந்தேன். அதற்குமுன் பத்துப் படங்களுக்கு மேல் பாடல் எழுதியிருந்தாலும், அப்பொழுதெல்லாம்

இல்லாத பதட்டம் என் இதய அறைகளில் அன்று சூழ்ந்து கிடந்தது. இறுதியாக பாடலைப் பார்த்த ரஹ்மானும், ரவிகுமாரும் சரணங்களைத் தேர்வு செய்தனர். பல்லவி மட்டும்

தேர்வாகவில்லை. பாடகர் சங்கர் மகாதேவனும் அதற்குள் வந்துவிட்டார்.

நீண்ட யோசனையில் என் நிமிடங்கள் கழிந்தன. சட்டென பொறி தட்டியது. படத்தின் தலைப்பையே பல்லவி யாக்கினால் என்ன? பொறிமூண்ட இரண்டொரு நிமிடத்தில் எழுதப்பட்ட

பல்லவிதான், ‘தெனாலி தெனாலி & இவன் பய த்துக்கு இங்கேது வேலி? தெனாலி தெனாலி & இவன் பயந்தால் ஊருக்குப்பல ஜோலி...’
பல்லவியைப் படித்த ரஹ்மான், ‘‘அருமை. இதைத்தான் எதிர்பார்த்தேன்’’ என்றார். ரவிகுமாருக்கும் திருப்தி. ரஹ்மான் இசையில் பாட்டெழுதும் எல்லா கவிஞர்களுக்கும் இந்த அனுபவம்

வாய்ப்பதுண்டு. அது எனக்கும் நிகழ்ந்தது. நெருப்பு நிமிடங்களில் நெய்யப்பட்ட பாடல் இது.

பாடலைக் கேட்டு, ‘‘நன்றாக எழுதி இருக்கிறீர்கள் கம்பன்’’ என்று வாழ்த்தி, அன்பாக முதுகில் தட்டிக்கொடுத்த கமல், என்றும் என் போற்றுதலுக்கு உரியவர். இந்தப் பாடலை, முகாமுக்குள்

அடைபட்டு, பகை இனத்தின் கொடுமைகளால் உதைபட்டு வாழ்கிற தொப்புள்கொடி உறவுகளுக்கு சமர்ப்பிக்கிறேன்.
(உலா வரும்)
நன்றி: தினகரன்

ரஜினியின் புதுப்படம் 'கோச்சடையான்'

2011-11-27T08:15:00.000-08:00

ரஜினி நடிக்கும் புதுப்படத்துக்கு ‘'கோச்சடையான்’ என்று பெயரிடப்பட்டுள்ளது. 3டி தொழில்நுட்பத்தில் உருவாகும் இப்படத்தை அவரது மகள் சவுந்தர்யா இயக்குகிறார். கே.எஸ்.ரவிகுமார் இயக்கத்தில் ரஜினி, தீபிகா படுகோன் இணைந்து நடிக்கும் ‘ராணா’ படத்தின் தொடக்க விழா, கடந்த ஏப்ரல் மாதம் 29ம் தேதி, வடபழனியிலுள்ள ஏவி.எம் ஸ்டுடியோவில் நடந்தது. முதல் காட்சியில் நடித்த ரஜினிக்கு திடீரென்று உடல்நலக்குறைவு ஏற்பட்டது. மயிலாப்பூர் இசபெல் மருத்துவமனையில் அனுமதிக்கப்பட்டு சிகிச்சை பெற்றார். பிறகு போரூர் ராமச்சந்திரா மருத்துவமனையில் சில நாட்கள் தங்கி சிகிச்சை பெற்றார். எனினும் அவரது உடல்நிலை தேறவில்லை.

இதையடுத்து ‘ராணா’ ஷூட்டிங் நிறுத்தப்பட்டது. மேல் சிகிச்சை பெறுவதற்காக, கடந்த மே மாதம் ரஜினி சிங்கப்பூர் சென்றார். அங்கு அதிநவீன சிகிச்சைகள் பெற்று, உடல்நலம் தேறினார். பிறகு சென்னை திரும்பினார். தன் மூத்த மகள் ஐஸ்வர்யாவின் வீட்டில் தங்கி சில மாதங்கள் ஓய்வு எடுத்தார். மீண்டும் அவர் சினிமாவில் நடிப்பது குறித்து அறிவிக்காத நிலையில், ‘ராணா’ படம் கைவிடப்படுவதாக தகவல் பரவியது. இதை ரஜினி தரப்பில் மறுத்து, வெகுவிரைவில் ‘ராணா’ ஷூட்டிங் தொடங்கப்படும் என்று அறிக்கை வெளியிட்டனர்.

இந்நிலையில் ரஜினி, இந்தி உட்பட பல மொழிகளில் உருவான ஷாரூக்கானின் ‘ரா ஒன்’ படத்தில், ஒரு காட்சியில் கவுரவ வேடத்தில் நடித்தார். இதற்கு அவர் சம்பளம் வாங்கவில்லை. சமீபத்தில் சென்னை வந்த ஷாரூக்கான், ரஜினியை நேரில் சந்தித்து, தன் படத்தில் நடித்ததற்கு நன்றி தெரிவித்தார். இதன்பின் திருமணம் மற்றும் நாடக விழாக்களில் ரஜினி கலந்துகொண்டார். மீண்டும் ‘ராணா’ ஷூட்டிங் பெங்களூரில் தொடங்குவதாக சொல்லப்பட்டது. இதை அவரது மகள் சவுந்தர்யா மறுத்தார். ரஜினி மீண்டும் சினிமாவில் நடிப்பாரா என்ற கேள்வி எழுந்த நிலையில், நேற்று மாலை ரஜினி சார்பில் ஈராஸ் பட நிறுவனமும், சவுந்தர்யாவும் இணைந்து ஒரு அறிக்கை வெளியிட்டனர். அதில் கூறியிருப்பதாவது:

ரஜினி நடிக்கும் ‘ராணா’ படத்துக்கு முன், புதிய பரிமாணத்தில் அவர் நடிக்கும் 3டி படத்துக்கு ‘கோச்சடையான்’ என்று பெயரிடப்பட்டுள்ளது. இது இந்தியாவில் தயாராகும், நடிப்பை பதிவிறக்கம் செய்யும் முதல் 3டி படமாகும். ஹாலிவுட்டில் ஜேம்ஸ் கேமரூன் இயக்கத்தில் தயாரான ‘அவதார்’, ஸ்டீவன் ஸ்பீல் பெர்க் இயக்கத்தில் உருவான ‘டின் டின்’ ஆகிய படங்கள் இந்த புதிய தொழில்நுட்பத்தில் உருவானவை. சரித்திரப் பின்னணியில் உருவாகும் ‘கோச்சடையான்’ படத்தின் கதை, திரைக்கதை, வசனம், டைரக்ஷன் மேற்பார்வை ஆகிய பொறுப்புகளை கே.எஸ்.ரவிகுமார் ஏற்றுள்ளார். ஈராஸ் நிறுவனத்துடன் இணைந்து மீடியா குளோபல் என்டர்டெயின்மெண்ட் நிறுவனம் தயாரிக்கிறது. சவுந் தர்யா அஸ்வின் இயக்குகிறார். அடுத்த வருடம் ஆகஸ்ட் மாதம் வெளியாக உள்ள இப்படத்தின் ஷூட்டிங், விரைவில் தொடங்குகிறது. ‘கோச்சடையான்’ படத்தைத் தொடர்ந்து ‘ராணா’ படத்தில் ரஜினி நடிப்பார். இவ்வாறு அதில் கூறப்பட்டுள்ளது.
-
நன்றி: தினகரன்

ஒரு பிரஜையின் குரல்-1

2011-11-25T11:30:00.000-08:00

சமுதாயத்தில் மக்கள் மத்தியில் ஒரு குறைபாடான குரல் எப்போதும் ஒலித்துக்கொண்டே இருக்கும். பெற்றவர்களை குறைசொல்லும் குழந்தைகள், ஆசிரியர்களை குறை சொல்லும் மாணவர்கள், அதிகாரிகளை குறை சொல்லும் ஊழியர்கள், என்று திருப்பும் பக்கமெல்லாம் குறைபாட்டின் குரல் ஒலித்துக்கொண்டே இருக்கும். அப்படித்தான் சமீபத்தில் டீ கடைகளிலும், பேருந்துகளிலும், கடை வீதிகளிலும் விலை வாசி உயர்வு குறித்து பொது மக்களின் குரல் அரசுக்கு எதிராக ஒலிக்கிறது. அதுமட்டும் அல்ல விரும்பி கூட்டணி ஏற்றுக்கொண்ட அரசியல் கட்சிகள் கூட ஆளும் அரசுக்கு எதிராக கோஷ்ங்கள் எழுப்புகின்றன. ஆளும் கட்சியோ விலை ஏற்றத்துக்கு காரணமாக முந்தைய அரசை குறை சொல்லுகிறது. இந்த குரல்களுக்கு மத்தியில் எல்லாவற்றையும் வேடிக்கை பார்த்துக்கொண்டே எதுவும் பேசாமல் ஊமையாய் அனைத்தையும் தன் தோள்களில் சுமந்து கொண்டு செல்கிறது ஒரு கூட்டம். பாரம் சுமக்கும் கூட்டம் தானே என்று சுமைகளை ஏற்றிக்கொண்டே போனால் என்னவாகும். சமீபத்தில் டெல்லியில் மத்திய அமைச்சர் சரத்பவாருக்கு நேர்ந்த கதிதான். குமுரும் உள்ளம் ஒரு நாள் கொந்தளிக்கும். இது மிரட்டல் அல்ல மக்களின் மனதை புரிந்து கொள்ள வேண்டி வைக்கப்படும் வேண்டுகோள். மத்திய அரசு ஒருபக்கம் சுமை ஏற்றுகிறது,

மாநில அரசு மறுபக்கம் சுமை ஏற்றுகிறது என்று சொன்னால் இடைப்பட்ட நடுத்தர மக்கள் நிலை என்னவாகும். வாழ்வா சாவா போராட்டத்தில் தள்ளப்படும் அவர்கள் சமூக விரோதிகளாகவும், போராட்டக்காரர்களாகவும், மாறும் துர்பாக்கிய நிலை ஏற்படும். எனவே சொல்லப்படும் குறைகளை அலட்சியப்படுத்தாமல் கொஞ்சம் செவிமடுங்கள். எந்த வகையில் எல்லாம் முடிகிறதோ அவற்றில் எல்லாம் நிவர்த்தி செய்யுங்கள். அரசு ஊழியர் அல்லாதவர்களும் அன்றாடம் காட்சிகளாக வாழும் தினக்கூலிகளும் மாதம் சம்பளக்காரகளும் இந்த அரசின் குழந்தைகள் தான். அவர்களும் இந்நாட்டின் பிரஜைகள்தான். மத்திய அரசும் மாநில அரசும் மாறி மாறி அவர்கள் முதுகில் சுமைகளை ஏற்றாமல் அவர்களையும் வாழவிடுங்கள்.

பாலமுரளி கிருஷ்ணாவுக்கு விருது

2011-11-22T06:07:00.001-08:00

சென்னை; சென்னையில் ஆண்டுதோறும் நடைபெறும் இசை விழசவை ஒட்டி சென்னை பாரதிய வித்யா பவனில் கலாச்சார விழா- 2011 நடைபெற்றது. இதில் பிரபலமான முன்னள் மற்றும் இந்நாள் கலைஞர்கள் கவுரவிககப்பட்டனர். பாலமுரளி கிருஷ்ணாவுக்கு பி.ஓபுல் ரெட்டி விருது வழங்கப்பட்டது. விரதை ஏற்று பாலமுரளி கிருஷ்ணா பேசுகையில், கலைகள் மற்றும் கலைஞர்களின் தாய்வீடாக திகழ்வது பாரதிய வித்யா பவன். கலைக்கும் கலாச்சாரத்தற்கும் இந்த அமைப்பு ஆற்றி வரும் பணி மகத்தானது. இந்த பணி தொடர வேண்டும் என்றார்.
விழாவில் தலைமை விருந்தினராக பங்கேற்ற யுனைட்டெட் இன்சூரன்ஸ் நிறவன மேலாண் இயக்குநர் ஜி.ஸ்ரீநிவாசன் பேசுகையில், இசை விழாவின்போது சென்னை வித்தியாசமான நகராக மாறி விடுகிறது. பாரதிய வித்யா பவனில் நடைபெறும் கலாச்சார விழா தரம் வாய்ந்ததாக உள்ளது. சிறந்த தரமான கலைஞர்களையும் ரசிகர்களையும் சந்திக்கும் வாய்ப்பு இதன் மூலம் கிடைத்தது. இந்த பாரதிய வித்யா பவனை உருவாக்கிய கே.எம்.முன்ஷி கூறியதைப் போல, இந்த அமைப்பு கடந்த காலத்திலும் நிகழ் காலத்திலும் எதிர்காலத்திலும் நம்பிøக் வைத்து அறிவு பூர்வ கலாச்சார இயக்கத்தின் முன்னோடியாக திகழ்கிறது. ஒழுக்கச் சீர்குலைவால் பாதிக்கப்பட்டுள்ள உலகை எதிர்நோக்கியுள்ள சவால்களைச் சமாளிக்கும் தகுதியான அமைப்பாக இது விளங்குகிறது என்றார்.
முன்னாள் தலைமை தேர்தல் ஆணையர் டி.எஸ்.கிருஷ்ணமூர்த்தி பேசுகையில், மூத்தவர்களின் நலனில் அக்கறை கொண்டு, மூத்த கலைஞர்களுக்கு, எதிர்காலம் இஞைர்கள் கையில் என்பதை நிரூபிக்கும் வøயில் இறைய கலைஞர்களுக்கும் இங்கு விருதுகள் வழங்கப்பட்டுள்ளன என்றார்.
நிகழ்ச்சியில், பி.ஞானாம்பாள் நினைவு விருதை கர்நாடக இசைக் கலைஞர் நித்யஸ்ரீ மகாதேவனுக்கு, அப்போலோ மருத்துவமனை குழுமத்தின் தலைவர் பிரதாப் சி.ரெட்டியின் மனைவி சுசாரிதா ரெட்டி வழங்கினார்.
பாரூர் எம்.எஸ். அன்நதராமன், செம்பனார்கோயில் எஸ்.ஆர்.ஜி.ராஜண்ணா, சுகுணா வரதாச்சாரி, பிரபஞ்சம் சீதாராம், ஜி.அபிலேஷ் ஆகியோருக்கும் கலாச்சார விருதுகள் வழங்கப்பட்டன.

"காலணா இதழ்' - சங்கு சுப்பிரமணியம்

2011-11-21T05:52:00.000-08:00

ஆங்கிலேயர் ஆட்சிக் காலத்தில் காந்தியத்தையும் தேசியத்தையும் தமிழ்நாட்டு மக்களிடையே பரப்பி, விடுதலை வேட்கையைத் தூண்டிய இதழ்களுள் குறிப்பிடத்தகுந்த ஒன்று "சுதந்திர சங்கு'. தொடங்கப்பட்டபோது வாரம் இருமுறையாக வந்த சுதந்திர சங்கு, மக்களிடம் கிடைத்த பரவலான ஆதரவைக்கொண்டு வாரம் மூன்று முறையாக வலம் வந்தது. ஒரு இதழின் விலை, காலணா. அதனால் இவ்விதழை "காலணா இதழ்' என்று அழைத்தனர்.

"சுதந்திர சங்கு' என்ற காலணா இதழைத் தொடங்கி மக்களிடம் சுதந்திர தாகத்தைத் தூண்டியவர் சுப்பிரமணியம். இப்பத்திரிகையை நடத்தியதால் இவர் சங்கு சுப்பிரமணியம் என்றே அழைக்கப்பட்டார்.

1905-ஆம் ஆண்டு நவம்பர் 18-ஆம் தேதி திருவாரூர் மாவட்டம், தேரழுந்தூரில் பிறந்தார். தமிழ், ஆங்கிலம், இந்தி, வடமொழி எனப் பன்மொழி புலமை மிக்கவராக விளங்கினார். பக்தியும் தேசியமும் இவருக்கு இரு கண்களாக இருந்தன.

1930-ஆம் ஆண்டு ஜனவரி 16-ஆம் தேதி சுதந்திர சங்கு ஆரம்பிக்கப்பட்டது. எட்டு பக்கங்களைக் கொண்டு, பாரதியாரின் "எங்கும் சுதந்திரம் என்பதே பேச்சு, சங்கு கொண்டே வெற்றி ஊதுவோமே' என்ற இரண்டு வரிகளையும் இணைத்து உருவாக்கப்பட்டதுதான் சுதந்திர சங்கு. "சங்கு கொண்டே வெற்றியூதுவோமே, இதைத் தரணிக்கெல்லா மெடுத்தோதுவோமே' என்பதுதான் சுதந்திர சங்கின் பெயருக்குக் கீழ் அமைந்த வாசகங்கள்.

அக்காலகட்டத்தில் வேறெந்த இதழும் செய்யாத அளவுக்கு தேசிய உணர்ச்சியை இவ்விதழ் தூண்டியது. அக்காலத்தில் சுதந்திர சங்கின் தலையங்கங்களைப் படிப்பதற்கென தனி வாசகர் வட்டமே இருந்தது. ஆங்கிலேயருக்கெதிரான எழுத்தாயுதமாக, நாட்டுப்பற்றையும் விடுதலை உணர்வையும் மக்களுக்கு எழுத்து வாயிலாக ஊட்டியது.

மிகச்சிறந்த தேசபக்தரான சங்கு சுப்பிரமணியம், பாரதியார், வ.வே.சு.ஐயர் ஆகியோரைத் தமது லட்சிய குருவாகக் கொண்டவர். அவர்களின் தாக்கம் இவரின் எழுத்திலும் வெளிப்பட்டது. தமிழ்ப் பத்திரிகையுலகில் ஒரு லட்சம் பிரதிகள்வரை சுதந்திர சங்கு விற்பனையாகி சாதனை படைத்தது குறிப்பிடத்தக்கது. இதற்குக் காரணமாக இருந்த சங்கு சுப்பிரமணியத்தின் எழுத்தாற்றலும் இவருடைய கட்டுரைகளுக்குத் தேர்ந்தெடுக்கும் தலைப்புகளும் சுதந்திர சங்குக்கு ஒரு வசீகரத்தை ஏற்படுத்தின.

சுதந்திர சங்கில் 3.6.1933-இல் "அஞ்ஞாதவாசம்' எனும் தலைப்பில் ஒரு தலையங்கம் வெளியானது. "அஞ்ஞாதவாசம்' என்றால் தலைமறைவு வாழ்க்கை என்று பொருள். இத்துடன் இதழ் நிறுத்தப்பட்டது. மீண்டும் சிறிது காலத்துக்குப் பிறகு சுதந்திர சங்கு வார இதழாக வெளிவந்தது. 24 பக்கங்களில் வெளிவந்த இவ்விதழின் விலை ஓரணா. மணிக்கொடியின் தாக்கத்தால் இம்முறை இதழின் உள்ளடக்கத்தில் நிறைய மாறுதல்களைச் செய்திருந்தார் சங்கு சுப்பிரமணியன். சிறுகதை, கவிதை, இலக்கியக் கட்டுரைகளுக்கு முக்கியத்துவம் கொடுத்திருந்தார். ஆனாலும் 28 இதழ்களுக்குப் பின்பு 1934-இல் மீண்டும் நாட்டு விடுதலைக்குச் சுதந்திர சங்கு பாடுபடும் என்ற அறிவிப்போடு இதழ் நிறுத்தப்பட்டது.

இரண்டாவது காலகட்டத்தில் வெளிவந்த சுதந்திர சங்கு இதழில் 65 கதைகள், 150 கட்டுரைகள், 25 கவிதைகள் வெளியாகியுள்ளன. மணிக்கொடி இதழுக்கு இணையாக சுதந்திர சங்கும் சிறுகதை வளர்ச்சிக்கு உதவியது. மணிக்கொடியில் கதை எழுதுவதற்கு முன்பே கு.ப.ரா. சுதந்திர சங்கில் எழுதினார். இவரின் மிகச்சிறந்த கதைகளுள் ஒன்றான "நூர் உன்னிஸô' சுதந்திர சங்கில்தான் வெளிவந்தது.

சங்கு சுப்பிரமணியம்தான் சி.சு.செல்லப்பாவை சிறுகதை ஆசிரியராக்கினார். ""அன்றைய இளம் படைப்பாளியான நான் அனுப்பிய முதல் சிறுகதையைப் படித்துவிட்டு சங்கு சுப்பிரமணியம் எழுதிய தபால் கார்டு வரிகள் இதோ: "இளம் தோழ, தங்கள் கதை கிடைத்தது.

புதிய கை என்று தெரிகிறது. எழுதி எழுதிக் கிழித்து எறியுங்கள். தங்கள் கதையைத் திருத்தி வெளியிடுகிறேன்' என்று எழுதியிருந்தார் சங்கு சுப்பிரமணியம். அடுத்த என் கதையை அவர் ஒரு எழுத்துகூடத் திருத்தாமல் வெளியிட்டார். நான் சிறுகதாசிரியன் ஆனேன். இப்படி இன்னும் வேறு யாராருக்கு அவர் செய்திருக்கிறாரோ, எனக்குத் தெரியாது. என் அஞ்சலி அவருக்கு என்றைக்கும்'' (இலக்கியச் சுவை) என்று சங்கு சுப்பிரமணியம் குறித்த தன் மனப்பதிவை சி.சு.செல்லப்பா வெளிப்படுத்துகிறார்.

வ.ரா., பாரதிதாசன், சுத்தானந்த பாரதி, நாமக்கல் கவிஞர் முதலியோர் சுதந்திர சங்கில் தொடர்ந்து எழுதியிருக்கின்றனர். சங்கு சுப்பிரமணியம் பத்திரிகையாசிரியர் மட்டுமன்றி சிறந்த சிறுகதை ஆசிரியரும்கூட. மணிக்கொடி, கலைமகள் போன்ற இதழ்களில் சிறுகதைகள் எழுதியிருக்கிறார். மணிக்கொடி கதைப் பதிப்பின் முதல் இதழில் "வேதாளம் சொன்ன கதை' என்ற புராணக் கதையம்சம் கொண்ட சிறுகதையை எழுதினார். அவருடைய "சிரஞ்சீவிக்கதை' என்ற சிறுகதை மிகுந்த சர்ச்சையை ஏற்படுத்தியது. சங்கு சுப்பிரமணியம் தன்னை சிறந்த பத்திரிகையாசிரியராக வெளிப்படுத்திக் கொண்டாரே தவிர, சிறுகதையாசிரியராக அல்ல.

சுதேசமித்திரன், மணிக்கொடி, ஹனுமான், தினமணி முதலிய இதழ்களிலும் இவர் பணியாற்றியுள்ளார். பாரதியின் கவிதைகளை மக்களிடம் கொண்டு சேர்ப்பதில் தீராத ஆர்வம் கொண்டவராகவும் இருந்தார். காந்தியின் கொள்கைகளைத் தீவிரமாகப் பின்பற்றினார். தீண்டாமையை ஒழிக்க தம்முடைய எழுத்தைப் பயன்படுத்திக்கொண்டார். தீண்டாமை ஒழிப்பில் தீவிரம் காட்டிய சரஸ்வதி அம்மையாரைத் திருமணம் செய்துகொண்டார்.

காந்தியடிகளின் ஆரோக்கிய வழி, இல்லற மகாரகசியம், ஹரிஜன சேவை ஆகிய மூன்று நூல்களையும் தமிழில் மொழிபெயர்த்துள்ளார். உப்பு சத்தியாகிரகத்தில் கலந்து கொண்டதற்காகவும், விடுதலைப் போராட்டத்தில் ஈடுபட்டதற்காவும் பல முறை சிறையும் சென்றுள்ளார்.கதர்த் துணிகளைத் தலையில் சுமந்தபடி, மகாகவி பாரதியின் பாடல்களைப் பாடியபடி ஊர்ஊராக நடந்து சென்று தேசிய சிந்தனையையும், சுதந்திர உணர்வையும் வளர்த்தவர் சங்கு சுப்பிரமணியம்.

ஜெமினி ஸ்டுடியோவில் சிலகாலம் பணி புரிந்துள்ளார். 1948-ஆம் ஆண்டு கே.எஸ்.கோபால கிருஷ்ணன் இயக்கத்தில் வெளிவந்த "சக்ரதாரி' என்ற திரைப்படத்திற்கு திரைக்கதை, வசனம், பாடல்களை எழுதியிருக்கிறார். சந்திரலேகா, ராஜி என் கண்மணி போன்ற படங்களிலும் பணியாற்றியுள்ளார். ஒரு சில திரைப்பாடல்களையும் எழுதியிருக்கிறார்.

"தினமணி'யில் பாகவதக் கதைகள் எழுதினார். இந்தக் காலகட்டத்தில் ஜயதேவரின் "கீதகோவிந்தம்' நூலை தமிழில் மொழிபெயர்த்தார். இன்றும் இம் மொழிபெயர்ப்பு கையெழுத்துப் பிரதியாகவே வலம் வருகிறது.

இப்படித்தான் வாழ வேண்டும் என்று ஒரு கொள்கைப் பிடிப்போடு வாழ்ந்த இவர், 1969-ஆம் ஆண்டு பிப்ரவரி 15-ஆம் தேதி மண்ணுலக வாழ்வை நீத்தார்.

சுதந்திர சங்கு என்ற இதழின் மூலமாக விடுதலை வேட்கையை விதைத்து, பல எழுத்தாளர்களை உருவாக்கி, காந்தியத்தையும் பக்தியையும் தம் எழுத்துகள் வழியாக மக்களிடம் கொண்டு சென்ற சங்கு சுப்பிரமணியத்தின் பங்களிப்பையும், தியாகத்தையும் அடுத்த தலைமுறை முழுமையாகத் தெரிந்துகொள்ள வாய்ப்பு இல்லாமல் இருப்பது வேதனை. ஆனால், தமிழ்ப் பத்திரிகை உலகில் சங்கு சுப்பிரமணியத்தின் பங்களிப்பை ஒருநாளும் மறக்கவோ, மறைக்கவோ முடியாது!
நன்றி : தினமணி

நெல்லை நெடுமாறனுக்கு "தமிழ் ஞாயிறு'' விருது

2011-11-21T05:48:00.000-08:00

நாமக்கல் மாவட்டம் பரமத்திவேலூரில், கவியரசர் கலைத்தமிழ் சங்கம் சார்பில் 2011-ம் ஆண்டு சுதந்திரதின விருதுகள் வழங்கும் விழா மற்றும் பரிசளிப்பு விழா மைனர் வீரப்பபிள்ளை சம்பூர்ணம்மாள் திருமண மண்டபத்தில் நடைபெற்றது. இதில் வரலாற்று ஆராய்ச்சியாளர் நெல்லை நெடுமாறனுக்கு 2011-ம் ஆண்டுக்கான "தமிழ் ஞாயிறு'' விருதை, திட்டக்குடி திரைப்பட
இயக்குனர் சுந்தரன் வழங்கினார். தொடர்ந்து தமிழ் ஓலைச்சுவடிகள் பாதுகாப்பு மைய தலைவர் தசரதனுக்கு உ.வே.சா. விருதும், வெங்காயம் திரைப்பட இயக்குனர் சங்ககிரி ராஜ்குமாருக்கு ''வித்தக இயக்குனர்'' விருதும் வழங்கப்பட்டது. மேலும் பாரதி விருது, கலைத்தொண்டர் விருதும் வழங்கப்பட்டன. பின்னர் சங்கமம் கணேசன் எழுதிய "இம்சை அரசியே'', நெல்லை சுதா எழுதிய "திரையிசைக்கேற்ற இனிய பாடல்கள்'', செந்தில்குமார் எழுதிய "கண்ணதாசனின் ஆளுமைத்திறன்'', சிவ.மகாலிங்கம் எழுதிய "திருக்குறள் - பன்னிரு திருமுறை வழியில் இல்வாழ்க்கை'' ஆகிய நூல்களை நெல்லை நெடுமாறன் வெளியிட்டு வாழ்த்தி பேசினார். நிகழ்ச்சிக்கான ஏற்பாடுகளை பரமத்திவேலூர் கவியரசர் கலைத்தமிழ் சங்க நிர்வாகிகள் செய்திருந்தனர்.

பாரதியார் பிறந்த நாள் விழாக் கவிதைப் போட்டி

2011-11-18T09:49:00.000-08:00

உலக இலக்கியக் கொண்டாட்டம்

2011-11-12T11:04:00.000-08:00

உலகெங்கும் வாசகர்களால் கொண்டாடப்படும் டால்ஸ்டாயின் அன்னா கரீனினா, தஸ்தாயெவ்ஸ்கியின் குற்றமும் தண்டனையும், பாஷோவின் ஜென்கவிதைகள், ஹெமிங்வேயின் கிழவனும் கடலும் , ஹோமரின் இலியட், ஷேக்ஸ்பியரின் மெக்பெத், ஆயிரத்து ஒரு அராபிய இரவுகள். ஆகிய ஏழு புத்தகங்கள் குறித்து நான் விரிவான ஏழு சொற்பொழிவுகளை நடத்த இருக்கிறேன்.

உலக இலக்கியங்கள் குறித்து தமிழில் முதன்முறையாக இந்தத் தொடர் உரைகள் நடைபெற இருக்கின்றன.

உயிர்மையுடன் ருஷ்யக் கலாச்சார மையமும், ஜெயகாந்தன் புஷ்கின் இலக்கியப்பேரவையும் இணைந்து இந்த நிகழ்விற்கு ஏற்பாடு செய்திருக்கிறன

நவம்பர் 21 திங்கள் முதல் 27 ஞாயிறு வரை தினசரி மாலை ஆறுமணிக்கு நிகழ்ச்சி நடைபெற உள்ளது

தினம் ஒரு புத்தகம் குறித்து ஒரு மணி நேர உரையும் அதைத்தொடர்ந்து அரைமணி நேரக் கலந்துரையாடலும் நடைபெறும்.

39 பெண்களை மணந்து 160 பேருடன் ஒரே வீட்டில் வசிக்கும் அதிசய மனிதர்

2011-11-12T08:51:00.000-08:00

அய்ஸ்வால் : மிசோரம் மாநிலத்தில், 39 பெண்களை மணந்து, 160 குடும்ப உறுப்பினர்களுடன் ஒன்றாக வசித்து வருகிறார், ஒரு அதிசய மனிதர். வடகிழக்கு மாநிலமான மிசோரத்தில் உள்ளது பக்தவாங் டியாங்னுவாம் கிராமம். இந்த கிராமத்தைச் சேர்ந்தவர் சையோனா, 67. விவசாயம், மரச்சாமான் தயாரித்தல் உள்ளிட்ட தொழில்களை நடத்தி வரும் சையோனாவுக்கு, 39 மனைவிகள்.

முதல் மனைவியின் பெயர் ஜதியாங்கி, 71. இவருக்கு ஏழு குழந்தைகள். கடைசி மனைவி பெயர் வன்லால்சியாமி, 31. இவருக்கு, ஐந்து வயது மகள் இருக்கிறாள். சையோனாவுக்கு, 15 மருமகள்கள் உள் ளனர். 29 மகள்கள் திருமணமாகி, கணவருடன் தனியாக வசிக்கின்றனர்.

நான்கு மாடி கட்டடத்தில், 101 பெரியவர்களும், 59 சிறுவர்களும் ஒரே குடும்பமாக வசிக்கின்றனர். கடந்த, 2000ம் ஆண்டு சையோனா, கடைசி திருமணம் செய்து கொண்டார். ஒட்டு மொத்த குடும்பத்தினரும், ஒரே சமையல் அறையில் சமைத்து, ஒன்றாக சாப்பிடுகின்றனர்.

காலை உணவுக்கு 50 கிலோ அரிசியும், இரவு உணவுக்கு 35 முதல் 50 கிலோ தானியத்தையும் சமைக்கின்றனர். அத்துடன் ஒவ்வொரு நாளும் 25 கிலோ உருளைக்கிழங்கு, 15 கிலோ பருப்பு மற்றும் ஏராளமான அளவில் காய்கறிகள் இவர்களின் வீட்டிற்கு தேவைப்படுகின்றன. மாமிசம் சமைத்தால், ஒரு நாளைக்கு 45 கிலோ மாமிசம் சமைக்கின்றனர்.

வீட்டு வேலைகளில் யார், யார் என்னென்ன வேலைகள் செய்ய வேண்டும் என்பதை முதல் மனைவி தீர்மானிக்கிறார். வீட்டில் உள்ள ஆண்களை மற்ற வேலைகளுக்கு அனுப்புகிறார் சையோனா. வீடு கட்டுமானப் பணி மற்றும் தோட்ட வேலைகள் போன்றவற்றுக்கும் ஆட்களை அனுப்புகிறார்.

75 கோடி வசூல் - 7ஆம் அறிவு முதலிடத்தில்

2011-11-10T08:42:00.000-08:00

தீபாவளிக்கு வெளியான படங்களில் 75 கோடி வசூல் செய்து முதலிடத்தை பிடித்திருகிறது 7ஆம் அறிவு. ஆனால் விஜயின் வேலாயுதம் 45 கோடியைத் தாண்டமுடியவில்லை. ஏழாம் அறிவு இன்னும் சில தினங்களில் எந்திரனின் வசூலை மிஞ்சிவிடும் என்று ஃபாக்ஸ் ஆபீஸ் வட்டாரங்கள் தெரிவித்து வரும் சூழ்நிலையில், 7ஆம் அறிவு டீமில் இருந்து முதல் ஆளாக அந்தபடத்தின் ஹீரோவான சூரியா இன்று பத்திரிகையாளர்களை சந்தித்து நன்றி கூறினார்.

அவர் பேசும்போது, படம் எவ்வளவு வசூல் செய்து இருக்கிறது என்பதை தயாரிப்பாளர் தரப்பில் இருந்து கூற வேண்டும். எனது நடிப்பில் வரும் ஒவ்வொரு படத்தின் வசூலையும் அடுத்த படம் தாண்ட வேண்டும் என்று நினைப்பேன்.

அதைப் போல எனது சிங்கம் படத்தின் வசூலை இப்பவே 7ஆம் அறிவு படம் தாண்டி விட்டது என்பதை நினைக்கும் போது பெருமையாக இருக்கிறது. 7ஆம் அறிவு படத்தில் போதிதர்மன் காஞ்சிபுரத்தில் வாழ்த்தாக காட்டி இருப்போம். அதைப் போலவே தெலுங்கிலும் அப்படித்தான் காட்டி இருக்கிறோம். தேவையில்லாமல் தெலுங்கில் வெளியான படத்தில் குண்டூரில் வெளியானது போல் காட்டி இருப்பதாக செய்திகள் வெளியாகி இருக்கின்றன.

இதும போன்ற செய்திகள் முற்றிலும் தவறானவை. படத்தினை பார்த்துவிட்டு பேச வேண்டும். தெலுங்கு படத்தினை பார்க்காமல் செய்திகளை பரப்புகிறார்கள். இந்தியில் நாங்கள் இன்னும் படத்தினை வெளியிடவே இல்லை. அதற்குள் இந்தியில் போதிதர்மன் தாராவியில் பிறந்து இருப்பது போல் காட்டி இருக்கிறார்கள் என்று செய்தி நிலவி வருகிறது. எப்போதுமே எனது படத்தினை முதல் 10 நாட்களுக்குள் தியேட்டரில் போய் பார்க்க மாட்டேன்.

சில காட்சிகளை இன்னும் கொஞ்சம் நல்ல செய்து இருக்காலமே என்று தோன்றும். முதன் முறையாக ரஜினி சார் வெளியே வந்து பார்த்த படம் ஏழாம் அறிவு. படத்தை பார்த்து பெண்டாஸ்டிக் பிலிம் என்று கட்டிபிடித்து பாராட்டினார்.

அவரிடம் நிறைய நேரம் பேச எனக்கு நேரம் அமையவில்லை. கமல் சார் பிறந்த நாளை முன்னிட்டு நேற்று அவரை பார்க்க சென்றேன். அப்போது என்னை மிகவும் பாராட்டினார். எனது அப்பா 7ஆம் அறிவு படத்தை பார்த்து விட்டு நான் புதிதாக இருக்கும் பெசண்ட் நகர் வீட்டிற்கு வந்து கட்டிபிடித்து அழுது பாராட்டியது எனது வாழ்நாளிலும் மறக்க முடியாத நிகழ்வு.

நான் டிவிட்டர், பேஸ்புக் இணையத்தில் எல்லாம் இல்லை. இணையத்தில் அனைவரும் வெவ்வேறு விமர்சனங்கள் வந்து இருக்கின்றன. அவ்வளவு நிறை குறைகள் அனைத்தையும் நான் ஏற்கிறேன். இனிமேல் வரலாற்று படங்களில் நடிப்பீர்கள் என்று கேட்கிறார்கள்.

இப்படத்தில் முதல் 20 நிமிட காட்சிகளுக்கு நிறைய உழைப்பு தேவைப்பட்டது. ஒரு பெரிய இயக்குனர் என்னிடம் ஒரு வரலாற்று கதை கூறி இருக்கிறார். இடைவேளை வரை நன்றாக இருந்தது. அதற்கு பிறகு தயார் செய்து வருகிறார். அனைத்தும் நல்ல விதமாக அமைந்தால் அப்படத்தில் நடிப்பேன். எனது படங்களுக்கு நான்தான் கதை கேட்கிறேன். இயக்குனர் வஸந்த் கதை கேட்டு நான் நடித்தால் இன்னும் சந்தோஷப்படுவேன்.

விஜய் சார் இன்னும் 7ஆம் அறிவு படத்தினை பார்க்க வில்லை என்று நினைக்கிறேன். ஆனால் அவரது மனைவிக்கு ஜோ டிக்கெட் கொடுத்து படத்தினை பார்க்க வைத்திருக்கிறார். ஒரு படத்திற்கு என்னமா உழைத்து இருக்கிறீர்கள்?! என்று மெசேஜ் அனுப்பி இருந்தார். சந்தோஷமாக இருந்தது.

நானும் இன்னும் வேலாயுதம் படத்தினை பார்க்க வில்லை. வேலாயுதம் ஒரு மசாலா படம் என்றால் 7ஆம் அறிவு வேறு விதமான படம். எனக்கும் மசாலா படங்களில் நடிப்பது மிகவும் பிடிக்கும். நானும் இதுவரை பல படங்களில் நடித்து இருக்கிறேன். இரண்டு விதமான படங்களும் மாறி மாறி செய்ய வேண்டும் என்று நினைப்பேன். மாற்றான் படத்தினை தொடர்ந்து மசாலா படத்தில் தான் நடிக்க இருக்கிறேன். ‘மாற்றான்’ படத்தில் ஒரு உருவம் இரண்டு தலை உள்ள ஒருவனாக நடிக்கிறேனா என்று கேட்கிறார்கள். அதை பற்றி இப்போது பேசுவது சரியாக இருக்காது. கோடை விடுமுறைக்கு இந்தப்படம் வெளிவர இருக்கிறது. ஹரி படத்தினை பற்றி முழுத்தகவலும் இன்னும் ஒரிரு வாரங்களில் தயாரிப்பாளர் தரப்பில் இருந்து வெளியாகும்” என்று பேசினார். சூர்யா மட்டும் தனியாக பத்திரிகையாளர் சந்திப்புக்கு வந்து இருந்தார். ----------- நன்றி: துருவம்

வில்லன் அவதாரம் எடுக்கும் அர்ஜீன்

2011-11-10T08:40:00.001-08:00

மணிரத்னம் அடுத்து இயக்க இருக்கும் படத்தில், வில்லனாக நடிக்க இருக்கிறார் ஆக்ஷ்ன் கிங் அர்ஜூன். தமிழ் சினிமாவில் இப்போதும், தனது நடிப்பால் அசத்தி வருபவர் நடிகர் அர்ஜூன். இவர் கடைசியாக "மங்காத்தா" படத்தில் அஜித்துடன் சேர்ந்து வில்லன் கதாபாத்திரத்தில் நடித்தார். மங்காத்தாவில் அர்ஜூனின் நடிப்பு ஹொலிவுட் வட்டாரத்தில் நல்ல வரவேற்பை பெற்றுள்ளது.

இந்நிலையில் மணிரத்னம் அடுத்து, கார்த்திக் மகன் கவுதமை வைத்து இயக்க இருக்கும் "பூக்கடை" படத்தில் அர்ஜூனையும் நடிக்க வைக்க இருக்கிறார். ஆனால் படத்தில் அர்ஜூன் ஏற்றிருப்பது வில்லன் வேடமாம். மணிரத்னம் படத்தில் அர்ஜுன் நடிப்பது இதுவே முதல்முறை. இதுபற்றி அவர் கூறுகையில், அவர் படத்தில் நடிக்க வாய்ப்பு கிடைத்ததை அதிர்ஷ்டமாக கருதுகிறேன் என்கிறார்.

நன்றி: துருவம்

தெலுங்கில் நண்பன் படத்துக்கு சிக்கல்

2011-11-10T08:39:00.000-08:00

தமிழ் டப்பிங் படங்களை வெளியிட ஆந்திராவில் கட்டுப்பாடுகள் கொண்டு வரப்பட இருக்கிறது. இந்த கட்டுப்பாடால் ஷங்கர் இயக்கியுள்ள ‘நண்பன்’ படத்தை தெலுங்கில் வெளியிடுவதில் சிக்கல் ஏற்பட்டுள்ளது. முன்னணி ஹீரோ நடித்த அல்லது பிரபல இயக்குனர்கள் இயக்கிய தமிழ் டப்பிங் படங்கள், நேரடி தெலுங்கு படங்களை விட ஆந்திராவில் வசூலில் சாதனை படைத்து வருகின்றன. இதனால் தெலுங்கு பட வியாபாரம் பாதிப்படைவதாக ஆந்திர மாநில விநியோகஸ்தர்கள் பல ஆண்டுகளாக கூறி வருகின்றனர்.

வரும் பொங்கலன்று (தெலுங்கில் சங்கராந்தி) ஷங்கர் இயக்கத்தில் விஜய், ஜீவா, ஸ்ரீகாந்த் நடித்துள்ள ‘நண்பன்’ படம், ’3 ராஸ்கல்ஸ்’ என்ற பெயரில் தெலுங்கில் டப் செய்யப்பட்டு வெளியிடப்பட இருக்கிறது. பொதுவாக ஷங்கர் இயக்கும் படங்கள் ஆந்திராவில் வசூலில் சக்கைப்போடு போடுவது வழக்கம். அதனால் அன்று வெளியாகும் நேரடி தெலுங்கு படங்கள் பெரும் பாதிப்பை ஏற்படுத்தும் என்று ஆந்திர விநியோகஸ்தர்கள் தெரிவித்துள்ளனர். இதையடுத்து ஆந்திர மாநில பிலிம் சேம்பர் ஒரு குழுவை ஏற்படுத்தியுள்ளது. இக்குழுவில், சுரேஷ் பாபு, தில் ராஜு, நாட்டிகுமார், உள்ளிட்ட தயாரிப்பாளர்களும் பூபால், ராம சுப்பா ரெட்டி, விஜயேந்தர் ரெட்டி உட்பட விநியோகஸ்தர்களும் இடம்பெற்றுள்ளனர்.

இந்தக் குழு, டப்பிங் படங்களுக்கான வரியை தற்போது இருக்கும் 20லிருந்து 50 சதவிகிதமாக உயர்த்துவது, சங்கராந்தி, விநாயக சதுர்த்தி, தசாரா உட்பட முக்கியமான விழாக் காலங்களில் நேரடி தெலுங்கு படங்களைத் தவிர மற்ற படங்களை வெளியிடாமல் இருப்பது, டப்பிங் படங்களுக்கான தியேட்டர்களை குறைப்பது, இவற்றை ஜனவரி முதல் தேதியிலிருந்து அமல்படுத்துவது உள்ளிட்ட விஷயங்கள் குறித்து விவாதிக்கும். ---நன்றி: துருவம்

எழுத்தாளர் ஜெயகாந்தனுக்கு ரஷ்யாவின் மிக உயர்ந்த விருது அறிவிப்பு!

2011-11-08T08:42:00.000-08:00

எழுத்தாளர் ஜெயகாந்தனுக்கு ரஷ்ய நாட்டின் மிக உயரிய நட்புறவு விருது (ஆர்டர் ஆஃப் ஃபிரண்ட்ஷிப்) வழங்கப்பட்டுள்ளது. இந்த விருதைப் பெறும் முதல் இந்திய எழுத்தாளர் ஜெயகாந்தன். இதற்கு முன்னதாக, பிரபல திரைப்பட இயக்குநர் மிர்ணாள் சென்னுக்கு இந்த விருது வழங்கப்பட்டுள்ளது.

ஜெயகாந்தனுக்கு இந்த விருது வழங்குவது குறித்து ரஷ்ய அதிபர் திமித்ரி மெத்வதேவ் பிறப்பித்த உத்தரவின் நகலை இந்தியாவுக்கான ரஷ்ய துணைத் தூதர் நிகோலாய் ஏ லிஸ்தபதோவ், ஜெயகாந்தனிடம் சென்னையில் திங்கள்கிழமை வழங்கினார்.

இது குறித்து அவர் கூறுகையில், "ரஷ்யாவின் உண்மையான நண்பர் ஜெயகாந்தனுக்கு விருது வழங்குவதில் பெருமையாக உள்ளது. இந்திய - ரஷ்ய உறவு வலுவாக அமைய ஜெயகாந்தன் ஆற்றிய பங்கு அபாரமானது.

ரஷ்ய எழுத்தாளர் புஷ்கினின் எழுத்துக்களை தமிழில் அவர் மொழிபெயர்த்துள்ளார். அதேபோல, அவரது இலக்கியப் படைப்புகள் ரஷ்ய மொழியிலும் உக்ரேனிய மொழியிலும் மொழி பெயர்க்கப்பட்டுள்ளன. தொடர்ந்து தனது பணியினை சிறப்பாக ஆற்ற ஜெயகாந்தனுக்கு இந்த விருது ஊக்கத்தைக் கொடுக்கும்," என்றார்.

இந்த நட்புறவு விருது வழங்கும் விழா சென்னையில் பிரம்மாண்டமாக நடைபெற உள்ளது. இந்தியாவுக்கான ரஷ்ய தூதர், ரஷ்ய அதிபரின் தூதுக் குழுவினர் விழாவில் பங்கேற்க உள்ளனர்.

இந்தோ-ரஷ்ய கலாசார மற்றும் நட்புறவு மையத்தின் தலைவராக ஜெயகாந்தன் உள்ளார். இவர் தனது எழுத்துப் பணியோடு இந்திய, ரஷ்ய நாடுகளிடையே உறவை வளர்க்கும் பணியில் தொடர்ந்து ஈடுபட்டு வருவதால் அவருக்கு இந்த விருது வழங்கப்பட்டுள்ளது.

அவரது நாவலைத் தழுவி எடுக்கப்பட்ட 'உன்னைப் போல் ஒருவன்' (1965) திரைப்படம் ரஷ்ய அதிபர் விருதைப் பெற்றது. இந்தோ-ரஷ்ய கலாச்சார மற்றும் நட்புறவு மையத்தை அவர் 2006-ல் தொடங்கினார். தொடர்ந்து ரஷ்யாவுடன் நல்லுறவைப் பேணி வருகிறார்.

புதுகைத் தென்றல் மாத இதழ் சார்பில் சிறுகதைப் போட்டி

2011-11-08T06:50:00.001-08:00

புதுகைத் தென்றல் மாத இதழ் சார்பில்

சிறுகதைப் போட்டி

முதல் பரிசு ரூ.1500

இரண்டாம் பரிசு ரூ.1000

மூன்றாம் பரிசு ரூ.500

கதைகள் 3 பக்க அளவில் இருக்க வேண்டும்.

தெளிவான கையெழுத்து, தட்டச்சு அல்லது கணனி அச்சு செய்யலாம்.

கதைகள் சொந்த கற்பனை என்றும், வேறு எந்த இதழுக்கும் அனுப்பவில்லை என்றும் உறுதிமொழி அளிக்க வேண்டும்.

கடைசி நாள்: நவம்பர் 25, 2011

அனுப்ப வேண்டிய முகவரி:

ஆசிரியர், புதுகைத் தென்றல், 24, திருநகர் முதன்மைச்சாலை, வடபழனி, சென்னை-600026.

Pudhugai Thenral Maatha Idhazh Saarbil

Sirukathai Potti

Muthal Parisu Ru.1500

Irandaam Parisu Ru.1000

Moondraam Parisu Ru.500

Kathaigal 3 Pakka Alavil Irukka Vendum.

Thelivaana Kaiyeluthu, Thattachchu allathu Gaani Achchu Seiyalaam.

Kathaigal Sontha Karpanai Endrum, Veru Yentha Idhalukkum Anuppavillai Endrum Uruthimozhi Alikka Vendum.

Kadaisi Naal: November 25, 2011

Anuppa Vendiya Mugavari:

Aasiriyar,

Pudhugai Thenral, 24, Thirunagar Muthanmai Salai, Vadapalani, Chennai-600026.

- Source: 14.10.2011 Dinamani Pg.3 Chennai Edition -

தமிழ்மொழிக்கு வளம் சேர்த்தவர்

2011-11-08T05:31:00.001-08:00

தமிழ்மொழியின் சிறப்பு!

திராவிடமொழி ஐந்தினுள் தமிழ்மொழிதான் வேறு எந்த மொழியின் தொடர்புமின்றி தனித்தியங்க வல்லதான செம்மொழி. உலக மொழிகளாகிய கிரேக்கம், இலத்தீன், எபிரேயம், வடமொழி போன்ற உயர் தனிச் செம்மொழிகளில் தமிழும் ஒன்று. தமிழில் உரைநடைப் பகுதி குறைவாக இருந்தபோதிலும், அதில் உள்ள காவியங்களும், இலக்கியங்களும் உலகிலுள்ள எம்மொழி இலக்கியங்களுக்கும் குறைந்ததல்ல என்று நான் துணிந்து கூறுவேன். தமிழ்மொழியின் இலக்கண அமைப்பு, உலகிலேயே சிறப்பு அமைப்பு என்றால் அது உண்மை. இது வெறும் புகழ்ச்சியில்லை.

பிறமொழியுள் தமிழ்ச்சொல்!

உலகத்தில் எழுத்தானியன்ற பழைய நூல்களிடைக் காணப்பெறும் பண்டைய திராவிடச் சொல் மயிலின் பெயர்க்குரிய சொல்லாகும். கி.மு.1000 ஆண்டுகளுக்கு முன்னாகவே தர்ஷிஷ், உவரி முதலிய இடங்களிலிருந்து மன்னர் சாலமனுடைய கப்பல்களில் ஏற்றிக்கொண்டு வரப்பட்ட வாணிபப் பொருள்களுள் மயிலிறகும் ஒன்றாகும் என்பது எபிரேய விவிலிய நூலிற் காணப்படும் சான்றாகும். இவ்விடத்தில் மயிலிறகு என்பதற்கு அரசர் பகுதியில், "துகி' என்ற சொல்லும்; வரலாற்றுப் பகுதியில், "தூகி' என்ற சொல்லும் வருகின்றன.

- கால்டுவெல்

"திரைக்கவித் திலகம்' கவிஞர் மருதகாசி

2011-11-08T05:30:00.002-08:00

மரபிலக்கியச் சாயல்களையும், தமிழ் மண்ணின் கலாசாரப் பெருமிதங்களையும் திரைப்பாடல்களில் வெளிப்படுத்திய மகத்தான பாடலாசிரியர் மருதகாசி. பாடலாசிரியர்களின் வரலாற்றில், கண்ணதாசனுக்கு முன்பே அதிகப் பாடல்களை எழுதி சாதனை படைத்த முதல் கவிஞர் என்ற புகழுக்கும் உரியவர்.

÷திருச்சி மாவட்டம் மேலக்குடிகாடு என்ற கிராமத்தில், 1920-ஆம் ஆண்டு பிப்ரவரி 13-ஆம் தேதி பிறந்தார். தந்தை பெயர் அய்யம்பெருமாள், தாயார் மிளகாயி அம்மாள். உள்ளூரில் தொடக்கக் கல்வி பயின்றபின், கும்பகோணம் அரசுக் கல்லூரியில் சேர்ந்து, உயர் கல்வி கற்றார். அருணாசல கவிராயரின் படைப்புகளின் தாக்கத்தால் எழுதும் தூண்டுதல் பெற்று சிறுவயதிலேயே கவிதை எழுதும் ஆற்றல் கைவரப் பெற்றார். கல்லூரிப் படிப்புக்குப் பிறகு, குடந்தையில் "தேவி நாடக சபை'யின் நாடகங்களுக்கும் மு.கருணாநிதி எழுதிய "மந்திரிகுமாரி' நாடகத்துக்கும் பாடல்கள் எழுதினார். கவிஞர் கா.மு.ஷெரீபின் நாடகக் குழுவுடன் இணைந்து பணியாற்றியதுடன், அந்நாடகங்களுக்கு இசையமைத்த திருச்சி லோகநாதனின் மெட்டுகளுக்கும் பாடல்கள் எழுதிவந்தார். பாபநாசம் சிவனின் சகோதரரும், பாடலாசிரியருமான ராஜகோபாலய்யரிடம் உதவியாளராக இருந்தார்.

÷தலைசிறந்த இசையமைப்பாளர் ஜி.ராமநாதன் "மாடர்ன் தியேட்டர்ஸ்' படத்துக்காக ஒலிப்பதிவுக் கூடத்தில் இருந்தபோது அவர் முன்னால் திருச்சி லோகநாதன், மருதகாசியின் நாடகப் பாடலைப் பாடிக் காட்டினார். அருகிலிருந்த இயக்குநர் டி.ஆர்.சுந்தரம், மருதகாசியின் பாடலின் உட்கருத்தால் கவரப்பட்டு உடனே அவரை அழைத்து முதல் வாய்ப்பை வழங்கினார்.

÷1949-இல் வெளிவந்த "மாயாவதி' படத்தின் மூலம் திரைப்பாடலாசிரியராக அறிமுகமானார் மருதகாசி. ""பெண் எனும் மாயப் பேயாம்... பொய் மாதரை என் மனம் நாடுமோ'' (மாயாவதி) என்று தொடங்கும் பாடல்தான் மருதகாசியின் முதல் பாடல். அந்தப் படத்தில் தொடங்கி சுமார் இருநூற்று ஐம்பது படங்களுக்கு மேல் பாடல்களை எழுதிக்குவித்தார். இவர் எழுதிய மொத்தப் பாடல்களின் எண்ணிக்கை நாலாயிரத்தையும் தாண்டும்.

÷மெட்டுக்கு விரைந்து பாடல் எழுதும் ஆற்றல் பெற்றவர் மருதகாசி. உடுமலை நாராயண கவிக்கு மெட்டுக்கு எழுதுவது சிரமமாக இருந்ததால், இந்திப் பாடல்களின் தமிழ்மொழி மாற்றத்துக்கு மருதகாசியை சிபாரிசு செய்தார். பின்னர், மாடர்ன் தியேட்டர்ஸின் ஆஸ்தான கவிஞராகவும் ஆனார்.

÷ஒருசில தமிழ்ச் சொற்களுடன் மிகுதியும் சம்ஸ்கிருதமும், சாஸ்திரியமுமாக பழைய கீர்த்தனைகளை அடியொற்றி உருவாகி வந்த திரையிசைப் பாடல்களில் இடம்பெற்ற பாகவதத் தமிழ், படிப்படியாகப் பாமரத் தமிழுக்கு முற்றிலும் தொனி மாறிய காலகட்டத்தில் பாடல் எழுத வந்தவர் மருதகாசி. திரைப்பாடல்களுக்கு இலக்கிய ரசிகர்களுக்கான சாளரத்தைத் திறந்து வைத்து, இசைத் தன்மையுடன் பொதுத் தன்மைக்கும் பாடல்களை நகர்த்திய முன்னோடிப் பாடலாசிரியர்களுள் தனிச் சிறப்புப் பெற்றவர் இவர் என்று சொல்லவேண்டும்.

÷""நீலவண்ண கண்ணா வாடா'' என்று மங்கையர் திலகம் படத்தில் இவர் எழுதிய பாடல் குழந்தைகளுக்கான தமிழ்த் திரைப்படங்களில் தீட்டப்பட்ட பாடல்களுக்கெல்லாம் மகுடம் எனக் கூறலாம். குழந்தைகளுக்கான திரைப்பாடல்களை அதிகம் எழுதியவரும் இவராகத்தான் இருக்கும்.

÷"சத்தியமே லட்சியமாய் கொள்ளடா', "சமரசம் உலாவும் இடமே', "முல்லை மலர் மேலே மொய்க்கும் வண்டு போலே', "ஏர் முனைக்கு நேர்முனை எதுவுமே இல்லை', "மணப்பாறை மாடுகட்டி', "ஆனாக்க அந்த மடம்', "வருவேன் நான் உனது மாளிகையின் வாசலுக்கே', "காவியமா? நெஞ்சின் ஓவியமா?' - முதலிய இவர் எழுதிய திரைப்பாடல்கள் நெஞ்சை விட்டு என்றும் அகலாதவை.

÷இவர், 1940-இல் தனகோடி என்ற பெண்ணைத் திருமணம் செய்துகொண்டார். இவர்களுக்கு ஆறு மகன்கள், மூன்று மகள்கள் உள்ளனர்.

÷கவிஞர் வாலி வாய்ப்புத் தேடிய காலத்தில், "நல்லவன் வாழ்வான்' படத்துக்காக "சிரிக்கின்றாள் இன்று சிரிக்கின்றாள்' என்ற பாடலை எழுதினார். இயற்கைத் தடைகளால் அந்தப் பாடலின் ஒலிப்பதிவு தள்ளிப்போய்க்கொண்டே இருந்தது. புதுப்பாடலாசிரியர் வாலி எழுதியதால், சகுனம் சரியில்லை; எனவே, பழம்பெரும் பாடலாசிரியர் மருதகாசியை வைத்து எழுத முடிவெடுத்தனர். மாற்றுப் பாடல் எழுத வந்த மருதகாசி, முதலில் வாலி எழுதிய பாடலைக்கேட்டு வாங்கிப் படித்துப் பார்த்தார்.

""புதுக்கவிஞர் வாலி மிகச் சிறப்பாக எழுதியிருக்கிறார். இதையே பயன்படுத்திக் கொள்ளுங்கள்'' என்று கூறிவிட்டாராம். வளர்ந்து வரும் கவிஞரான தன்னைத் தாய்போல் ஆதரித்த மருதகாசியின் சககவி நேசத்தை மனம் நெகிழ்ந்து கவிஞர் வாலி தனது "நானும் இந்த நூற்றாண்டும்' என்ற நூலில் குறிப்பிட்டுள்ளார். ஜி.ராமநாதன், கே.வி.மகாதேவன், எஸ்.தட்சிணாமூர்த்தி, விஸ்வநாதன்-ராமமூர்த்தி ஆகிய அனைத்து இசை அமைப்பாளர்களின் படங்களுக்கும் மருதகாசி பாடல்கள் எழுதியுள்ளார்.

÷1960-களிலிருந்து கண்ணதாசனுக்கே வாய்ப்புகள் வழங்கப்பட்டதால், மருதகாசி பின்னுக்குத் தள்ளப்பட்டார். ஒருசில படங்களைத் தயாரித்து பண நஷ்டத்துக்கும், மனக் கஷ்டத்துக்கும் ஆளானார். அதனால் சொந்த ஊருக்கே திரும்பிச் சென்றவர், எம்.ஜி.ஆரால் அழைக்கப்பட்டு மீண்டும் சினிமாவில் மறுபிரவேசம் செய்தார். கே.எஸ்.ஜி., தேவர் படங்களுக்கு மட்டும் பாடல்கள் எழுதும் வாய்ப்பு அவருக்குக் கிடைத்தது.

÷தேவர் பிலிம்ஸின் "விவசாயி' படத்தின் அத்தனை பாடல்களையும் இவரைக் கொண்டு எழுத வைத்தவர் எம்.ஜி.ஆர். "கடவுளென்னும் முதலாளி கண்டெடுத்த தொழிலாளி விவசாயி', "இப்படித்தான் இருக்கவேணும் பொம்பளை' போன்ற "விவசாயி' திரைப்படத்தின் பாடல்கள் இன்றும் கருத்துச் செறிவும், சமுதாயக் கண்ணோட்டமும் உடையதாகப் பாராட்டப்படுபவை. தேவர் பிலிம்ஸ் படங்களில் மருதகாசிக்கு நிச்சயமாக ஒரு பாடல் இருக்கும்.

÷டி.எம்.செüந்தரராஜனை சினிமாவுக்குக் கொண்டுவந்த பெருமை மருதகாசியையே சேரும்.

"திரைக்கவித் திலகம்' என்னும் பட்டம் பெற்றவர் மருதகாசி. மருதகாசியின் திரையிசைப் பாடல்களையும் புத்தகங்களையும் தமிழக அரசு நாட்டுடைமை ஆக்கியுள்ளது. தமிழ்த் திரையிசைப் பாடல்களில் தனி முத்திரை பதித்த மருதகாசி, 29.11.1989-இல் காலமானார்.

÷தமிழ் சினிமாவைப் பற்றிய பதிவுகளில் தவிர்க்க முடியாத பங்களிப்பு மருதகாசியுடையது. கவியரசு கண்ணதாசன், கவிஞர் வாலி இருவரும் அறுபதுகளிலிருந்து தமிழ் சினிமாவில் முன்னணிப் பாடலாசிரியர்களாக வலம் வந்தாலும்கூட, மருதகாசியின் பாட்டுகளுக்குத் தனித்துவமும், ஜனரஞ்சகமும் இருந்ததால், அவரை ஒட்டுமொத்தமாக ஓரம்கட்டிவிட முடியவில்லை. மருதகாசியின் திரையிசைப் பாடல்கள் புத்தகமாகவும் தொகுக்கப்பட்டுள்ளது.

விளம்பிநாகனார் நான்மணிக்கடிகை

2011-11-08T05:30:00.000-08:00

பறை நன்று பண் அமையா யாழின் நிறை நின்ற

பெண் நன்று, பீடு இலா மாந்தரின் பண் அழிந்து

ஆர்தலின் நன்று, பசித்தல் பசைந்தாரின்
தீர்தலின் தீப்புகுதல் நன்று.
(பாடல்-13)
பண்ணொடு பொருந்தி சரியாக வாசிக்கப்படாத யாழைவிட வல்லோசை எழுப்பும் பறையே
நல்லது. பெருமை இல்லாத மனிதரைவிடக் கற்புப் பிறழாத பெண்மை மிக நல்லது. உடலுக்குத்
தீங்குதரும் பதம்கெட்ட பண்டங்களை உண்பதைவிடப் பசியோடு இருப்பதே நல்லது. அன்புக்கு
உரியவரிடமிருந்து (கணவன்) பிரிந்து உயிர் வாழுதலைவிடத் தீப்புகுந்து உயிர் நீத்தல் நல்லது.

முருகனை அழகாக அபிநயித்த பவானி

2011-11-04T07:19:00.000-07:00

சென்னை நாரதகான சபா, ஞானானந்தா கலையரங்கத்தில் பவானி நடன அரங்கேற்ற நிகழ்ச்சி சிறப்பாக நடந்தது. நாட்டிய சங்கல்பா நடனப் பள்ளி மாணவியானதால், குரு கலைமாமணி ஊர்மிளா சத்ய நாராயணாவைப் பிரதிபலித்தார்.
முருகு என்றாலே அழகு. தமிழும் இனிமை. முருகக் கடவுளும், தமிழில் பாடினாலே ஏறு மயிலேறி பறந்து வந்து காத்தருள்வான் என்ற வாக்குப்படி பிரதான வர்ணமும், அழகன் முருகன் மீது கடுகை நமச்சிவாயப் புலவர் இயற்றிய தமிழும், இணைக்கப்பட்ட கமாஸ் ராகத்தில் அமைந்த, அருமையான வர்ணமாக இருந்தது.
நடன அமைப்பு செய்திருந்த, நாட்டிய சங்கல்பாவின் இரு ஆசான்களான கலைமாமணிகள் ஊர்மிளா மற்றும் சுவாமிமலை சுரேஷ் ஆகியோருடைய அற்புதமான கற்பனைகளுடனும் அபாரமாக இருந்தது.
மாமோகம் மீறுதே லாகிரி (கமாஸ் - ஆதி) என்ற வர்ணத்தின் முதல் வரிக்கே, அவருடைய கற்பனைகள் சிறக்க அபிநயங்கள் திகைக்க வைத்தன. வழுவூர் தோடயமங்களமாக, யானைத் தோலை உரித்து போர்த்திக் கொண்ட, கிருத்திவாசேசுவருடைய புகழை கேட்ட மாத்திரத்திலேயே உள்ளம் மகிழ்ந்தது. நாட்டியத்தின் நாயகன் அல்லவா வழுவூர் சிவன்.
இந்த நாட்டிய சம்பிரதாயத்தை காப்பாற்றி, மென்மேலும் கவுரவத்தை சேர்த்த குரு கலைமாமணி கே.என்.தண்டாயுதபாணி பிள்ளை மற்றும் கலைமாமணி சரசா இருவரையும், அவர்கள் நடனத்திற்கு செய்த சேவையையும் மனதார வாழ்த்தியது சிறப்பு. பிரபல நடனமணி ருக்மணி தேவியின் நாட்டிய வடிவமைப்பில், கல்யாணி (ஆதி) ஜதீசுவரம் பவானியின் முக அட்டமி கர அசைவுகளுடன், செஞ்சுருட்டி ராகத்தில், திச்ர நடையில் வள்ளிக் கணவன் பேரை என்ற காவடி சிந்துவிற்கு, பவானி உயிர் துடிப்புடன் பொலிவாக ஆடியதும் வரவேற்க வைத்தது.
இந்த நாட்டிய நிகழ்ச்சியின் சிகரமாக பவானி ஆடிய (ராகமாலிகை) தேவாரப் பாடல்களின் அபிநயத்தின் வடிவமைப்பு, மிக உயர்வாக அமைந்திருந்தது. காரணம், முனைவர் ரகுராமனின் விளக்கங்களுடன் குருமார்கள் பொருளை அறிந்து கொண்டு, குருக்கள் நாட்டிய வடிவமைப்பை, முதல் தரமாக செய்ததற்கு பாராட்டியே ஆகவேண்டும்.
தோழியிடம், சிவபெருமான் சிறப்புக்களை விளக்கி, அவரை வர்ணிக்கும் நாயகியின் அழகிய அபிநயங்கள் பாராட்ட வைத்தன. இதேபோல், திருநாவுக்கரசருடைய நான்காம் திருமுறை தலையே நீ வணங்காய் (சாதாரி பண்) அபிநயத்தையும் பவானி ஆடியதையும் கண்டு, நாட்டிய வடிமைப்பிற்காக பாராட்டி, குருக்களை தலைவணங்க வைத்தது திறமை.
பரதநாட்டிய நிகழ்ச்சிகளில், பெரும்பாலும் தெலுங்கு மொழியின் ஆதிக்கமே அதிகம். ஆனால், தீந்தமிழிலும் தேவாரம் போன்ற திருப்பதிகங்களில் இருந்தும் ஆடுவதற்கு நிறைய விஷயங்கள் சிறப்பாக அமைந்திருந்தாலும், சரியாக பொருள் அறிந்து வழிகாட்டுதலை செய்பவர்கள் மிக அரிதாகவே உள்ளார்கள் என்பதால், இந்த நிகழ்ச்சியை சிறப்பாக வழிகாட்டுதலுடன் அமைய காரணமாக இருந்து உதவிய முனைவர் ரகுராமனை மனதார பாராட்டலாம்.
சிறப்பு விருந்தினர்களாக கலந்துகொண்டு, முனைவர் ரகுராமனும், கபிலர் - சேக்கிழார் விழாக்குழுத் தலைவருமான டி.எஸ்.தியாகராஜன் இருவருமே, பவானியின் நாட்டியத் திறமை குருவின் பயிற்சியை பாராட்டி ஆசிகளை நல்கினர்.
சிறப்பான நட்டுவாங்கத்திற்காக, இளம் சாயி பிரசன்னா பாடிய சுவாமி மலை சுரேஷ் (நடன அமைப்பு செய்தவர் இவரே) கலையரசன் (வயலின்), குரு பரத்வாஜ் மிருதங்கம், ரமணா குழலிசை, முருகன் ஒப்பனை எல்லாவற்றுக்கும் மேலாக, கலைமாமணி ஊர்மிளாவின் அக்கறை, பயிற்சி எல்லாமே பவானிக்கு சிறப்பான எதிர்காலத்திற்கு நல்ல அஸ்திவாரம் எனலாம்.
- மாளவிகா

நன்றி : தினமலர்

தரம் பாதி; ஜனரஞ்சகம் மீதி!

2011-11-04T07:14:00.000-07:00

தொலைக்காட்சியின் நானாவித சேனல்கள் மக்களின் வீட்டு வரவேற்பறையை ஆக்ரமிக்கத் தொடங்கிய காலகட்டமான எண்பது, தொண்ணூறுகளில் வானொலி என்கிற சாதனம் கிட்டத்தட்ட வழக்கொழிந்து போயிருந்தது. சென்ற பத்து பதினைந்து வருடங்களாக வானொலியின் எஃப்.எம். ஒலிபரப்புக்கள் புத்தம் புதிய பொலிவுடன் புது சிந்தனைகளை முன் வைத்து ரசிகர்களை ஒட்டுமொத்தமாகத் தன் பக்கம் திருப்பியது.

தொலைக்காட்சியைப் பார்க்க வீட்டுக்கு ஓடிவரவேண்டும். ஆனால் ஒரு கையடக்கமான ரேடியோ மூலம் (இப்போது மொபைல்களிலும் கேட்கலாம்) ஆபீஸிலும், ஓடும் பஸ்ஸிலும் ஆட்டோவிலும் பயணித்தபடியே பாட்டு கேட்கலாம். பழவண்டி தள்ளுபவரும், பூ விற்பவரும், வாயில் காப்போரும் பொழுதுபோக்கிற்கு எஃப்.எம். அலைவரிசையைத்தான் நம்புகிறார்கள்.

அனைத்து தரப்பு மக்களிடமும் ஆதிக்கம் செலுத்துவதாலோ என்னவோ இந்த ஒலிபரப்பாளர்கள் பெரிதும் நம்புவது திரைப்படப் பாடல்களையும் திரை சம்பந்தமான நிகழ்ச்சிகளையும்தான். இவற்றிலிருந்து மாறுபட்டு நிற்கின்றன, 94.3 அலைவரிசையில் நாம் கேட்கும் "ரேடியோ-ஒன்' நிகழ்ச்சிகள். இந்த அலைவரிசையில் கர்நாடக இசையை ஒலி பரப்புவது மட்டுமின்றி, மேடைக் கச்சேரிகளும்

நடத்திவருகின்றனர்.

""ரேடியோ.ஒன்' "சென்னை ஒன் மியூசிக்' என்ற பெயரில் மூன்று மாதங்களுக்கு ஒருமுறை கர்நாடக இசை நிகழ்ச்சிகளை நடத்துகின்றது. இந்த நேரடிக் கச்சேரிகள் மூலம் ரசிகர்களின் நாடித் துடிப்பை அறிய முடிகிறது. அவர்களின் தேவையைப் புரிந்து செயல்பட முடிகிறது. இது எங்களுடைய இயக்குநர் மார்டின் கிங் கருத்து. இதே போன்று மற்ற முக்கிய நகரங்களில் "மும்பை ஒன்', "தில்லி ஒன்' என அந்தந்த இடங்களுக்குரிய இசையை வழங்குகிறோம்.

சென்னை, கர்நாடக இசையின் இருப்பிடமாக இருப்பதால், கர்நாடக இசையை வழங்குகிறோம்'' என்றார் "சென்னை ஒன்' பொறுப்பாளர், அமீத் ரஹேஜா. நித்யஸ்ரீ மகாதேவன், ப்ரியா சகோதரிகள் ஆகியோரின் கச்சேரிகள் நடந்து முடிந்து, இந்த மாத நிகழ்ச்சியாக சமீபத்தில் சுதா ரகுநாதனின் ஜனரஞ்சகமான கச்சேரி நடந்தது.

சாருகேசி வர்ணத்துடன் கச்சேரியை சுவையாகத் தொடங்கினார். "அருள்புரிவாய் கருணைக்கடலே', "அலைபாயுதே கண்ணா', "குறை ஒன்றும் இல்லை', "கண்டநாள் முதலாய்..' போன்ற பல எளிமையான பாடல்களைப் பாடினாலும், "ஸôமஜ வரகமணா', "மஹாலட்சுமி ஜகன்மாதா' போன்ற அழுத்தமான கீர்த்தனைகளும் பாடி தனது வித்வத்தை வெளிப்படுத்தினார். சங்கராபரண ராக ஆலாபனை நல்ல தரம். "ஸôமஜ வரகமணா' கிருதியில் ஸ்வரங்கள் அபாரம். தரத்தையும் ஜனரஞ்சகத்தையும் சரியான விகிதத்தில் கலந்து மக்களைக் கவர்வதில் சுதாவிற்கு நிகர் அவரே என்பதை மீண்டும் நிரூபித்தார்.

""கர்நாடக சங்கீதம் மட்டுமின்றி, கிராமியப் பாடல்கள், பக்தி, பஜன் பாடல்கள் ஆகிய மேடை நிகழ்ச்சிகளும் நடத்தத் திட்டம் இருக்கிறது. சினிமா பாட்டுகள் மட்டும் எங்கள் பட்டியலில் கிடையாது'' என்று நம்மை வியப்பில் ஆழ்த்தினர், "ரேடியோ ஒன்' பொறுப்பளர்கள்.

நமது மண்ணுக்கே உரிய இசைக்கு முன்னுரிமை தரும் இவர்கள் முயற்சிக்குப் பாராட்டுக்கள்!

நன்றி : தினமணி

கிறுக்கல்கள் சித்திரமாகின்றன

2011-11-04T06:56:00.000-07:00

மன்னார் நானாட்டான் பிரதேசத்தைச் சேர்ந்த பி. அமல்ராஜின் கிறுக்கல்கள் சித்திரமாகின்றன என்ற கவிதைத் தொகுதி 76 பக்கங்களை உள்ளடக்கி அண்மையில் வெளிவந்திருக்கிறது. இது இவரது இரண்டாவது நூலாகும். ஏற்கனவே இவர் வேர்களும் பூக்கட்டும் என்ற உளவியல் நூலொன்றையும் வெளியிட்டிருக்கிறார்.

தியாகம் அவள் பெயர், நீதான் அவள், நீ - நட்பு - காதல், முதிர்கன்னி, செத்தா போய்விட்டேன், கல்லறைக் கனவு, எனது ஆட்டோகிராப்ஃ, ஒரு ரயில் பயணம், முள்ளிவாய்க்கால் முடிவுரை, தமிழ் சுதந்திரம், ஊர்ப் பக்கம், பயணங்கள் முடிவதில்லை, ஒரு காதல் காவியம், அடங்காத காதல், கொன்றுவிடுங்கள், மொட்டைக் காதலும் முடிந்து போன கற்பனையும், கடற்கரைக் காதல், புதுமைப் பெண்ணும் தோற்றுப்போன ஆணும் ஆகிய தலைப்புக்களில் இக்கவிதைகள் இடம்பெற்றிருக்கின்றன.

இந்தக் கவிதைத் தொகுதியில் சமூகம் சார்ந்த பிரச்சினைகள், காதல், அழகியல் போன்றவை பாடுபொருள்களாக விரவிக் காணப்படுகின்றன.

'காதலையும் கிளர்வையும், இளம் பெண்களையும் மட்டுமே கவிப் பொருள்களாகக் கொள்ளும் எம் இளைஞர்கள் மத்தியில் ஒரு வித்தியாசமான கவிஞனாக அமல்ராஜைக் காண்கிறேன். சமூகத்தின் நிகழ்வுகளை தன் அக்கரையுள்ள சமூகப் பார்வையினால் நோக்கி ஆதங்கப்படுகிறார், ஆத்திரப்படுகிறார். தாய்மை பற்றி உருகும் கவிஞர், யுத்தம் பற்றிக் கவலைப்படுகிறார். முள்ளி வாய்க்கால் முடிவுரையை வாழ்க்கையை முழுதும் தொலைத்த ஒரு பெண்ணை முன்னிறுத்தி எம்மையும் சோகத்தில் ஆழ்த்துகிறார். சில காதல் கவிதைகளிலும் அவரின் கவித்திறமை, காதல் உள்ளம் புரிகிறது.' என்று ஏ.ஆர்.வீ. லோஷன் அவர்கள் தனதுரையில் குறிப்பிடுகின்றார்.

அணிந்துரை வழங்கிய கவிமாமணி அகளங்கன் அவர்கள் 'இன்று ஈழத்தில் வெளிவரும் இலக்கியப் படைப்புக்களில் கவிதை நூல்களே அதிகம் என்பது கணக்கிடப்பட்டுள்ளது. புதுக்கவிதைத் தொகுப்புக்களே அதிகம் வெளிவருகின்றன. அதில் காதல் கவிதைகளே அதிகம் காணப்படுகின்றன. அதற்குக் காரணம் இளைஞர்களே அதிகமாக இத்துறை சார்ந்த நூல்களை எழுதிவெளியிடுவதே. சில புதுக் கவிதைத் தொகுப்புக்கள் வெறும் நாட்குறிப்புப் புத்தகம் போல அல்லது காதலிக்கு அனுப்ப வேண்டிய காதலனின் கடிதம் போல இருக்கின்றன. சில தொகுப்புக்கள் காதலையும் சமூகத்தையும், சம காலத்தையும் பாடுவனவாக அமைந்துள்ளன. இந்த வகையில் பி. அமல்ராஜின் கிறுக்கல்கள் சித்திரமாகின்றன என்னும் இக்கவிதைத் தொகுதி காதலோடு சமகாலம், சமூகப் பிரச்சினை என்பவற்றை கலந்ததாக அமைந்துள்ளதைப் பாராட்டலாம்.' என்கிறார்.

நூலாசிரியர் தனதுரையில் 'கவிதையை நான் அதிகம் நேசிப்பவன். அவற்றை அதிகம் வாசிப்பவனும் கூட. கவிதையை எழுதுவது சுலபம். ஆனாலும் அதை நல்ல கவிதைக்குரிய இயல்புகளுடன் காலத்திற்கு ஏற்றாற் போல் உருவாக்குவதில்தான் ஒரு கவிஞனின் வெற்றி தங்கியிருக்கிறது. அந்தவகையிலே, நானும் ஒரு நல்ல சமூகக் கவிஞனாக வெற்றிபெற வேண்டுமென்பதே எனது ஆவல். வாசித்தாலும் யதார்த்தச் சிந்தனைப் போக்கும் தரமான கவிதைகளை உருவாக்க ஊன்றுகோல்களாக அமையவல்லன.' என்கிறார்.

திருமணமாகாத ஒரு பெண்ணின் மனநிலையை முதிர்கன்னி (பக்கம் 12) என்ற கவிதையில் தெளிவாக எடுத்துக்காட்டியிருக்கிறார். சீதனம் என்ற பிரச்சனைப் பற்றி காலங்காலமாக பேசி வந்தாலும் அது தருகின்ற காயங்கள் மட்டும் ஏனோ இன்னும் ஆறவில்லை. வாழையடி வாழையாக அந்த பிரச்சனை எல்லா சமூகத்திலும் ஊடுறுவி விட்டது. தாலி பாக்கியம் பெறாமல் முதுமையாகிக்கொண்டிருக்கும் ஒரு பெண் இதயத்தின் ஓசைகள் இவ்வாறு சோக கீதம் பாடுகின்றது.

மஞ்சத்துப் பெண்கள் கொஞ்சிக் குலாவும் முற்றத்தின் மூலையில் மூச்சுமின்றி பேச்சுமின்றி முக்காட்டோடே முப்பது வருடங்கள்... இது அலரிப் பூவும் அந்தஸ்து கேட்கும் காலம் அப்படியிருக்க இந்த அல்லிப்பூ மட்டும் ஏன் இன்னும் சாகாமலும் சமையாமலும் விலைபோகாமல் கிடக்கிறது? கையிலில்லை - எங்களிடம் ஆனால் கைகளிருக்கு. பணமில்லை உண்மைதான் மனமிருக்கு - நல்ல குணமிருக்கு...

செத்தா போய்விட்டேன் (பக்கம் 18) என்ற கவிதையில்

ஓர் அந்திப் பொழுதின் முந்திப் பார்க்கும் பிந்திய பகல்களுக்;குள் சிக்கிக் கேட்கும் யுத்த விமானங்களின் குண்டு மழையில் நனைந்து கரைந்த வலது கையும்... வெட்ட வெளியில் விட்டு வந்த வீட்டுப் பொருட்களை மீட்கப்போய், நட்டு வைத்த கன்னி வெடியில் காலை வைத்து மண்ணோடு போன மற்றொரு காலும்... என் உடலில் - ஓர் உறுப்பென்று இன்று மறந்தே போனது எனக்கு... என்று கவிஞர் வேதனைப்படுகிறார். மட்டுமல்லாமல் எங்களையும் கண்கலங்க வைக்கிறார்.

கடந்த காலங்களின் பொதுமக்கள் பட்ட துயர்களை வைத்து பயணங்கள் முடிவதில்லை (பக்கம் 52) என்ற கவிதை எழுதப்பட்டிருக்கின்றது. எத்தனை துன்பங்கள் வந்தாலும் தாம் மடிந்து போக மாட்டோம் என்றும் வயிற்றில் உதைத்தாலும் முதுகில் பிள்ளையை சுமப்பவர்கள் தமது வீரத்தாய்கள் என்றும், இழப்பும் களைப்பும் தம்மை ஒன்றும் செய்யவியலாது என்றும் உறுதியாக கூறி நிற்கிறார். இவரது மன ஆதங்கம் நியாயமானது. இதை அவர் சொல்லியிருக்கும் பாங்கு வித்தியாசமானது.

இன்று தொடங்கிய
பயணமல்ல - அது
நாளை முடிவதற்கு
எமது பயணங்களுக்கு
எனது வயதாகிறது...
சொத்தை இழந்தோம்
செத்துவிடவில்லை
மண்ணை இழந்தோம்
மாண்டுவிடவில்லை
மானமிழந்தோம்
மண்டியிடவில்லை

ஒரு காதல் காவியம் (பக்கம் 58) என்ற கவிதை நகைச்சுவைப் பாங்கில் எழுதப்பட்டிருக்கிறது. காதலித்து ஏமாறும் ஆண்களின் வேதனையும், காதலித்தவளையே கரம்பிடித்த ஆடவனின் சோகத்தையும் நயக்கத்தக்கதாக வெளிப்படுத்தியிருக்கும் பாங்கு இதமாயிருக்கிறது. ஓரிரு பெண்கள் செய்யும் சில தவறுகள், சில ஆண்கள் செய்து விட்டுப்போகும் காதல் லீலைகள் காதல் என்ற வார்த்தையின் உள்ளார்ந்த சுகத்துக்கே கேடு விளைவிப்பதாக மாறிவிட்டது. தற்காலத்தில் காதல் வெறும் பொழுதுபோக்காக மாறி இருக்கிறது. இந்தக் கவிதையின் சிறப்பாக உவமான உவமேயத்தை மாலை நேரம் கவிஞரின் மனதில் எத்தகைய கற்பனையை தோற்றுவித்திருக்கிறது என்பதை நோக்கலாம்.

சோம்பல் முறிக்கும் மாலைப்பொழுது
தங்கச் சூரியனும் தாண்டமுடியாக் கடலும்
கொஞ்சம் கூட வெட்கமின்றி
ஒருவரை ஒருவர் ஆரத்தழுவி
முத்தமிட்டுக்கொள்ளும் நேரம்

விஷமிகளாக சமூகத்தில் நடமாடித்திரியும் இரட்டைவேடம் கொண்டவர்களுக்கு சாட்டையடியாக எழுதப்பட்டிருக்கிறது கொன்றுவிடுங்கள் (பக்கம் 65) என்ற கவிதை. நேர்மையில்லாத பார்வைகளும், மகிழ்ச்சியற்ற சிரிப்பும், உண்மையற்ற புகழ்ச்சியும், யதார்த்தமற்ற வார்த்தையும் கொண்டு போலிகளாக நடிக்குமிவர்களிடமிருந்து தப்புவதே சிறப்பானது என்பதை ஆணித்தரமாக எடுத்துக்காட்டும் அழகிய முன்மாதிரி இந்தக் கவிதை. இவ்வாறானவர்களுடன் வாழ்வதை விட செத்துவிடுதல் மேலானது என்ற கருத்தை இன்று பலர் சொல்வதைக் கேட்கிறோம். இந்த கருத்தை பிரதிபலிக்கும் இரு வரிகள் இவ்வாறு அமைந்திருக்கிறது.

பொய்யான வாழ்க்கை மலிந்துகிடக்கிறது இதற்குள் உண்மைகள் மட்டும் பொசுங்கித் துடிக்கிறது.. போலி முகங்களை ஒப்பனை செய்து அழகாக பொருத்தியிருக்கிறார்கள் சில மனிதர்கள்.

காதல், சமூகம், போர், தாய்மை போன்ற பல அம்சங்களை வைத்தும் கவியெழுதும் ஆற்றல் மிக்க இளம் கவிஞரான பி.அமல்ராஜ், எதிர்வரும் காலங்களிலும் இன்னும் பல இலக்கிய படைப்புக்களைத் தரவேண்டும் என்று வாழ்த்துகிறேன்.

நூலின் பெயர்; - சிறுக்கல்கள் சித்திரமாகின்றன (கவிதைத் தொகுதி)
நூலாசிரியர் - பி. அமல்ராஜ்
முகவரி - 66, பெரியகமம், மன்னார்.
தொலைபேசி - 023 2251364, 0773 268913.
விலை - 150/=

- வெலிகம ரிம்ஸா முஹம்மத்

உலகம் கொண்டாடும் 700 கோடியாவது குழந்தைகள்!

2011-10-31T03:56:00.000-07:00

உலக நாடுகள் பலவும் 700 கோடியாவது குழந்தைகளை கொண்டாட்டங்களுடன் வரவேற்றுள்ளன.

முன்னதாக, உலகின் மக்கள்தொகை 700 கோடியாக இன்று உயர்வதை ஐக்கிய நாடுகள் அமைப்பு அதிகாரப்பூர்மாக அறிவித்தது.

எனினும், ஏழுநூறு கோடியாவது குழந்தை எங்கு பிறக்கும் என்று புவியியல் நிபுணர்களால் உறுதியாக கூறமுடியவில்லை.

இந்த நிலையில், பிலிப்பைன்ஸ் தலைநகர் மணிலாவில் உள்ள ஜோஸ் பப்பல்லா நினைவு மருத்துவமனையில் நள்ளிரவுக்கு 2 நிமிடங்களுக்கு முன்பு ஒரு பெண்குழந்தை பிறந்தது.

கமில்லே டலுரா கமில்லே டலுரா, புளோரினேட் டலூரா தமபதியினரின் அந்த 2-வது குழந்தையே 700 கோடியாவது குழந்தையாக கருதப்பட்டது. 2.5 கிலோ எடை கொண்ட இந்தக் குழந்தைக்கு டானிகா மே காமகச்சோ என்று பெயர் வைக்கப்பட்டுள்ளது.

பத்திரிகையாளர்களின் கேமரா வெளிச்சமும், மக்களின் ஆரவாரமும் அக்குழந்தைக்கு வரவேற்பாக அமைந்தன.

இந்தியாவின் 700-வது குழந்தை..
இதேபோல், பல்வேறு நாடுகளிலும் 700 கோடியாவது குழந்தைகளுக்கான அடையாளத்துடன் பல குழந்தைகள் பூமிக்கு வரவேற்கப்பட்டன.

இந்தியாவில், உத்தரபிரதேச தலைநகர் லக்னோவில் இன்று காலை 7.10 மணிக்கு பிறந்த நர்கிஸ் என்று பெயரிடப்பட்ட பெண்குழந்தை, 700 கோடியாவது குழந்தை என்ற அடையாளத்தைப் பெற்றது.

பாசிட்டிவ் பான் கி மூன்...

உலக மக்கள்தொகை 700 கோடியைத் தொட்டுள்ளது குறித்து ஐ.நா. பொதுச் செயலர் வெளியிட்டுள்ள செய்தி:

"மக்‍கள்தொகை மிக அதிகமாக பெருகி வருவதால் ஜனநெருக்கடி என்று சிலர் கூறலாம். ஆனால், என்னை பொருத்தவரையில் 700 கோடி வலிமை படைத்த மக்‍களைக்கொண்ட சமுதாயமாக நாம் உருவெடுத்துள்ளோம் என்றே கருதுகிறேன்.

பூவி வெப்பமடைதல், பொருளாதாரச் சிக்‍கல், ஏற்றத்தாழ்வுகள் ஆகியவற்றுக்‍கு தீர்வு காணும் ஒரே குறிக்‍கோளுடன் உலக மக்‍கள் அனைவரும் ஒன்றிணைந்து பாடுபடவேண்டும்.

உலகலாவிய பிரச்னைகளுக்‍கு, உலகலாவிய தீர்வுகள் தேவைப்படுவதால், அனைத்து நாடுகளும் ஒன்றிணைந்து செயல்படவேண்டிய கட்டாயம் ஏற்பட்டுள்ளது," என்று பான் கி மூன் கூறியுள்ளார்.